Company lârte cho chhuak turin Thar chhuah tam a ngai - Lalsawta

Finance department leh Planning department changtu minister Lalsawta chuan, company liante cho chhuak turin thar chhuah tam a ngaih thu a sawi a, "Thawhrim aia thawh rim loh a hlâwk zawk zawk chhung hi chuan hnam hi a ding chhuak thei lo," a ti.

Lalsawta leh Planning Board vice chairman H Liansailova te chuan nimin khan Aizawl Press Club-ah thuthar thehdarhtute kâwmin, tun hnaia Mizoram High Level team anga Gujarat-a an hnathawh dante zira an kal chungchang, an thil zir chanchin leh Mizoramin a entawn tura an hmuhte an sawi.

Lalsawta chuan, Mizorama thlai chi hrang hrang thar chhuahte leitu tur ko lut tur chuan an duhkhawp ang thar a ngaih thu sawiin, "Company lâr chin cho chhuak tur chuan thar chhuah tam hmasak a ngai a, a chi aṭanga uluk a ngai. Thar tam tur chuan thil chi hrang hrang tikual loa luhchilh a ngai a, Mizoram mipui kan chet suau a ngai ang," a ti.

Gujarat-a kut hnathawktute leh lo neitute sorkarah an innghat lian lo a, cooperative society anga thawhho an uar hle tih sawiin, Lalsawta chuan, thawhrim aia thawh rim loh a hlâwk chhung chuan hnam a ding chhuak thei lo tih a sawi a; tun dinhmunah chuan Mizorama kut hnathawktute sorkar aṭanga ṭanpuina (subsidy)-ah an la innghah nasat thu a sawi.

Zawhna chhangin Lalsawta chuan, Gujarat-a hna an thawh danah entawn tur tam tak a awm thu a sawi a, "Kan entawn turte hi an sang khawp mai. Mahse, bul ṭan tur kan ni a, tun hma thil chu awm mah se, bul kan ṭan a ngai a ni. Bul ṭan turin remruatna kan nei a; tih loh ai chuan tlai pawh a ṭha zawk a ni," a ti.

Planning Minister chuan, Gujarat-a an thil zir aṭanga Mizorama hmalak theihna tur an hmuhchhuahte chu New Economic Development Policy (NEDP) hnuaiah tih theih tam tak a awm thu sawiin, market economy-a luh a ngaih tawh thu a sawi a, "Kan lo neitute hi rate sang tak leh man to tak kan tiam thei lo ang," a ti a; state dangte nen inel ve a, state dangte rate anga tih ve theih a ngaih thu a sawi.

Lalsawta chuan, NEDP hnuai-ah thlai leh thei thar chhuah dah-ṭhatna tur cold storage-te tam zawk siam tum a nih thu a sawi. Mizoram sorkarin cold storage a din tawhte chungchanga zawhna chhangin Dr H Saithanliana chuan, Vairengtea cold storage chu Silchar-a mite'n man chawiin an hman a sawi a, Champhaia cold storage chu hman a ni lo tih sawiin, "A ṭáwl a ni ber mai," a ti.

Planning Board vice chair-man H Liansailova chuan, Mizo-ramah pawisa project a lian
ṭhin a, a ṭhatna chin pawh a awm avangin kalpui a ni tawh ṭhin tih a sawi a, "Mahse, sum inpekah hian kan táng reng tur a ni lo. Market economy-ah kan luh a ngai a, hei hi NEDP thil tum pakhat a ni. Thlai chi hrang hrang chíng duah loin, hmun pakhatah tih bik kan neih a ngai tawh," a ti.

Planning secretary Dr C Van-lalramsanga chuan, Gujarat-ah chuan miin ram a neihchhun hralh phal a nih loh thu leh ram an inpek ve mai mai ngai loh thu a sawi. Aizawl hnaivaia ramte chu mi hausa ram vek a nih tawh avangin Aizawla ṭhalai, kut hnathawh duhte tan hmun a awm tawh loh chungchanga zawhna chhangin Planning Secretary chuan, a thawk peihte'n hna an thawhna hmun tur a awm theih nan NEDP-ah ruahmanna a awm thu a sawi.

High Level Team hi Novem-ber 24-25, 2016 chhung khan Gujarat-a hmun hrang hrang fangin, an hmalak dante an zir chiang a; minister pathum - Lalsawta, PC Lalthanliana leh C Ngunlianchunga te, Planning Board vice chairman H Liansailova leh Planning secretary Dr C Vanlalramsanga te bakah, sorkar official-te an kal a ni.