Thalaite tan Mizoram ngeia hna thawh tur Kan ngaihtuah dawn - MNF Vice President

MNF vice president Dr R Lalthangliana chuan, MNF economic policy thar tur, Socio-Economic Development Programme (SEDP) an duang zo tawh tih a sawi a, "Ṭhalai hna nei lote tan Mizoram chhung ngeia hna thawh tur kan ngaihtuah dawn," a ti.

Nimina Aizawl West-II Block MNF-in Dawrpui Vengthar YMA Hall-a political training an neihnaah Dr R Lalthangliana chuan, SEDP-ah thingtlanga mite leh khawpuia miretheite dinchhuah tak takna tur ruahmanna siam a nih thu sawiin, "SEDP hi Congress NEDP nena khaikhin chuan vahrit leh chêpâ khaikhin ang vel a ni," a ti a; Mizo ṭhalai hna hmu lote phai lama thawn ve loin, Mizoram ngeia an thawh tur an ruahman dawn niin a sawi.

MNF Vice President chuan, Congress tlak hri a lêng nia sawiin, "Mipui hian chhungkaw sorkar an ning tawh a, kum 2013 inthlanpui hnua inthlan awm reng rengah Congress an tla fai deuh vek a, kum 2018 inthlanpui kan hmachhawn turah MNF chuan sorkarna kan siam ngei dawn tih a chiang a ni," a ti. MNF-te chu Pathian dah hmasa chunga ram leh khaw-tlang tana theihtawp chhuah zel turin a chah.

MLA Lalruatkima pawhin thu sawiin, Congress flagship programme NLUP chu Chief Minister-in 'Pathian programme' tiin sawi mah se, kum nga an kalpui a, cheng vbc. 2700 chuang an sên hnuah pawh an hlawhchhampui niin a sawi a, "MNF economic policy SEDP hming rûin, a duplicate siamin NEDP an phuahchawp leh ta a ni," a ti.

Lalruatkima chuan, Congress sorkar chu mipuiin an ning tawh hle niin a sawi a; kum riat an sorkar chhungin kawng a chhiat thu te, gas a harsat thu te, hlawh la thei lo an tum thute a sawi bawk.