Battle Honour Chhamb Day lawm
5th. Assam Regiment aṭanga pension chhuak intél khawm, Ex-Fighting Fifth Association (EFFA) chuan nimin khan MZP conference hall-ah 'Battle Honour Chhamb Day Celebration' vawi 48-na an hmang a, MJA Gen. Hqrs. president Zonunsanga Khiangte-in a hmanpui.
MJA President chuan, kum 1971-a Chhamb indonaa huaisen taka ram tana beitute chhuanawm a tih thu sawiin, Mizo hnam tihmingṭhatute an nih thu a sawi a, "A hun lai khan sûlhnu pawr leh dâwihzep ṭawngkamte chhuah ula chuan Mizo hnam tan hmingchhiatna leh hnam rinawm loa chhuak thei kan ni a, chutiang ni loin, Pathian hruaina avangin Mizote tihmingṭhatu in ni ta zawk a ni," a ti.
AIDS vangin Mizoram a hmingchhia tih sawiin Zonunsanga Khiangte chuan, "Sipai lamah erawh chuan India sipai zinga Mizo awm vete hian Mizo te chanchin ṭha hnam dangte entawn tur in hnutchhiah ṭhin," a ti a; kum 1971-a India leh Pakistan indo laia an chêtna chuan tun thlengin Mizote tan hmingṭhatna a thlen tih a sawi.
Chhamb Day lawmna hi EFFA president Sub. Lalṭana'n a kaihruai a, Capt. H Khiangte leh Capt. Ngura Sailo ten Chhamp indo chanchin an sawi. Chawhnuah Day lawmna ruai an kîlho a ni.