Lungsenah Cultural Meet an hmang

Lungsen khawtlang chuan nimin khan an khaw khelmualah Cultural Meet an hmang a, bialtu MLA Zodintluanga, minister-in a hmanpui. Minister chuan, culture ni si, thil ṭha lo lakah insiamrem a ngaih thu a sawi.

Zodintluanga chuan, pi leh pute hun aṭanga chin tawh ṭhin, tunlaia chìn atana ṭha tawh lo a awm theih thu sawiin, chu'ngah chuan insiamrem ve zel a ṭul thu a sawi a; "Culture hi mihring kan changkan leh hmasawn dan mila inthlak danglam hret hret a ni a, pi leh pute tih dan a ni tih vanga mihring dikna chanvo kalha chêtna awm thei ang chite chu kan thenfai hret hret a ngai," a ti.

Hnam nunphungte chu vawn nun reng a ṭul thu sawiin Zodintluanga chuan, "Kan culture hi kan hnam zia leh ropuina a ral mai loh nan theihtawp chhuaha kan vawn nun a tul a, culture hian hnam inpumkhat nan mi a tuam
ṭha em em a ni," a ti a; tuna Mizote awm dan leh nun dante pawh hun kal zelah Mizo culture a la nih dawn avangin khawtlang nunhonaah hawihháwmna leh inzahtawnna ṭha, nun ze nghet neih a pawimawh thu a sawi.

Zodintluanga chuan, "I lo changkân tâk vanga i culture i kalsan a nih chuan, nangmah i inphatsan tihna a ni. Mi huaisente chuan an culture an kalsan ngai lo," a ti.

Lungsena Cultural Meet-ah hian Lungsen khaw mite bakah, an khaw chhehvel khuaa mi te, Tlabung YMA, Rolui YCA leh Undermanik YCA-te'n hnam lâm chi hrang hrang - Párlàm, Khuallàm, Sárlàmkai, Cheraw, Chawnglaizawn leh Chai te an entir a; zaithiamte an zai bawk. Meet hi Art & Culture department, Mizo Cultural Organisation leh Lungsen Joint Committee-te huaihawt a ni.