HCDC-in Saikhawthlir RMSA School sak dan sawisel

Hachhek Constituency Development Committee (HCDC) chuan thuchhuah siamin, Saikhawthlir khuaa RMSA secondary school building sak mekah a sak dan tur ang ni loa sak a awm nual niin an tarlang.

HCDC thuchhuah tarlan danin, Saikhawthlira RMSA school sak mek hi HCDC hruaitute'n nimin khan an tlawh a, Saikhawthlir V/C, YMA leh Chuhvel V/C-te'n an ṭawiawm. In sak lai chu drawing nen en milin, tukverh leh ventilation 21 ve ve a kim lo a, mipa zun-in pali turah pathum chiah siam a ni. Rualbanlote kalna tur (ramp) siam a ni lo a, front step siam a ni lo bawk.

HCDC chuan, RMSA building sak danah an lung-awi loh thu an sawi a; sak dan tur ang taka sa tur leh a ṭul anga hma la turin sorkar an ngen tih an tarlang.