CM Hawla'n MYA Hall a hawng

New Siaha-a Model Youth Association (MYA) Multipurpose Hall sak thar chu Thawhṭanni khan chief minister Lal Thanhawla'n a hawng. Hall sak nan hian Backward Regions Grant Fund (BRGF) sum nuai 80 hman a ni.

Chief Minister chuan, BRGF chu sorkar laipuiin district hnufual bikte tan a ruahman a nih thu sawiin, "Kawng hrang hrang leh hmasawnna kawnga intluktlànna atana a buatsaih a ni. Mizoramah chuan Siaha leh Lawngtlai district-te hian BRGF hi an hmang ṭangkai hle a, mahse, hmun ṭhenkhata utilization certificate leh progress report-te a hun taka sorkar laipuia an thehluh loh vanga sum dawn tur ang kan dawng lo hi a vanduaithlakin a lungchhiatthlak ṭhin," a ti.

Lal Thanhawla chuan, "Pathianin min hûnna apiang hi a rawngbawl tura min dahna a ni tih hriat a pawimawh a; rinawmna, dikna, taimakna leh
Amah ṭihna nung nen a hming tizah-awm leh tiropui turin ka chah duh che u ni," a ti a; Pathian kan lama a ṭan chuan policy, programme, hna-thawhte a hlawhtlin ṭhin thu a sawi.

Hall hawn inkhawm hi Siaha district-a DRDA project director VL Hruaizela'n a kaihruai a, MADC chief excutive member RT Zachono pawhin thu a sawi.

MYA Multipurpose Hall hi sq.metre 500-a zau a ni a, hall hnuaia basement-I chu sq.metre 421.25-a zau niin, table tannis hall, MYA office leh car parking a awm a; basement-II chu sq.metre 183.90 zau a ni thung.