Ngopa-in CHC-ah doctor dah phût

Ngopa khuaa V/C, tlawmngai pawlte leh political party-te ṭangho chuan thuchhuah siamin, an khuaa damdawi-in (community health centre)-ah doctor dah an phût thu an tarlang.

Ngopa thuchhuah tarlan danin, an khuaa damdawi-in chu khum 30 awm theihna turin kum 1994-ah hawn a ni a, CHC-ah hlankai a ni tawh. Tun thlengin CHC anga enkawl a ni lo a, doctor pawh hun rei tak chhung pakhat chauh a awm. CHC hi Ngopa leh a chhehvel khua bakah, Manipur leh Myanmar khuate thlengin an pan ṭhin a ni.

Ngopa CHC-a doctor awmchhun chu thlaktu awm loin September 30, 2016-ah transfer a nih thu sawiin, "Hei hian mipuite min barakhaihin mangang takin min siam a, doctor kan neih loh chhung hian damlo enkawlna pek chung-changahte harsatna kan tâwk a, thihna hial pawh Ngopa bikah mi parukin an tawk tawh a, mipuite kan thlabar tak zet a ni," an ti.

Ngopa V/C, NGO leh political party-te chuan, NE Khawdungsei PHC-a doctor chu Ngopa CHC hmui tura tih a nih thu sawiin, "Hei hi kan hrethiam lo a, Ngopa khua leh bial mipuite zahlohna leh ngaihthahnaah kan ngai," an ti a; December 3, 2016 ral hma ngeiin Ngopa CHC-ah doctor grade-III tal dah a nih loh chuan doctor an neih hma chuan hmalak an tum thu an tarlang.