SARAS Fair 2016 ṭan a ni

Nimin khan Mahatma Gandhi lim bula Transport department builing tharah Regional Sales of Articles of Rural Artisans Society (SARAS) Fair 2016 ṭan a ni a; Vanapa Hall-ah Rural Development minister R Lalzirliana'n a hawng.

RD Minister chuan, self help group (SHG)-te kutchhuak zawrhna hmun buatsaih a ni chu lawmawm a tih thu sawiin, "Mizoramah SHG tharthawh leh a ni hi a lawmawm hle. Mahni intodelh pawimawhzia inkawhhmuhna atan hmanraw pawimawh tak a nih ka beisei," a ti a; Regional Saras Fair 2016 chu mipuiin hlut thei ngei se a duh thu a sawi.

Tun hmaa Mizo mipui rilru nia lang, 'Hna thawh tumna nei si loa hnam dangte táwngpáwng huphurh a, mahni thawh theih hna, hnam dangte thawhtir' tih chu thlak danglam mek zel a nih thu sawiin R Lalzirliana chuan, "Kan mikhualte, kan thawh ai thawka kan sum an rama hawn thla leh ṭhinte thawh tur kan thawhkhalh a hun tawh," a ti.

Fair hawnnaa tarlan danin, tun din-hmunah Mizoram State Rural Livelyhood Mission hnuaiah Mizoramah SHG 1,244 an awm mek a, hei hian chhungkua 10,242 a tuam.

Regional Saras Fair-ah hian dawr 126 an inziak lut tawh a, state páwn
aṭanga rawn la kal tur leh kalkawnga la thang mekte nen dawr hawng zat an la pung dawn a ni.