Nau chunga nu thihna zirho

Health department chuan nimin khan Lawng-tlai DC conference hall-ah nau chunga nu thihna (raicheh) chungchang zirhona, 'Sensitization meeting on Community & Facility Based Maternal Death Review' an buatsaih.

Meeting-ah hian hri-selna lama thawktu te, koh-hran leh tlawmngai pawl hrang hrang aiawhte an tel a; nau chunga nu thihna chungchang leh a chhan hrang hrang awm theite an zirho. Raicheha thihna tihniam tura hmalak dan tur te, hmasawnna tur leh siam ṭhat ngaite an sawiho nghal.

Meeting-a tarlan danin, kumin chhung hian Lawng-tlaiah nau chunga nu thihna (maternal death) ṭum khat a thleng tawh a, maternal mortality rate (MMR) chu 143 (nau piang nuai khat zelah nu 143 an thi tihna) a ni.

MMR tihniam tur hian Health sub-centre hrang hrangah nau neihna hmun siam tum a ni a, nau chhar tur (attendant) zirtir mek zel an ni. Nu nau paiin an mamawh ang enkawlna an hmuh ngei theih nan leh damdawi-inah ngei nau an neih theih nan health worker leh ASHA-te'n hma an la ṭhin a ni.