Bru pawlte Supreme Court-ah zualko nawn

Mizoram Bru Displaced People Forum (MBDPF)-in an dinhmun leh an thil phût chungchang Supreme Court-in a ngaihtuah dan chu lungawithlak tâwk loa an ngaih avangin Supreme Court-ah public interest litigation (PIL) an thehlut nawn.

MBDPF vice president R Laldawngliana'n zawhna chhanga a sawi danin, PIL hi Supreme Court-a Bar Association general secretary hmangin an thehlut a ni. A hmain an dinhmun leh sorkarin anmahni a enkawl dan a ṭha tâwk lo nia ngaiin pawl pahnih, Akhil Bharatiya Vanvasi Kalyan Ashram leh Asian Center for Human Rights-te'n Supreme Court-ah PIL an thehlut tawh a; chu'ngte chu Supreme Court-in a ngaihtuah zawh hnu lawkah PIL thar an thehlut leh a ni.

PIL an thehluhah chuan Tripura relief camp paruka Bru-te dinhmun te, an thil phût hrang hrang sorkarin a la ngaihtuah lohte chu Supreme Court-in ngaihtuah se an duh thute an ziak a; Akhil Bharatiya Vanvasi Kalyan Ashram leh Asian Center for Human Rights-in PIL an thehluh Supreme Court-in a tihtawp dan chu an duhkhawp loh thu an ziak bawk.