Kazakhstan ṭhalaite nen hun hmangho

Indian Council for Cultural Relations (ICCR) leh Mizoram Art & Culture department buatsaihin Ningani khan Vanapa Hall-ah cultural programme buatsaih a ni a, Kazakhstan ṭhalaite pawh an tel.

Cultural programme hmanpuitu R Lalzirliana, Art & Culture minister chuan, khawvel changkang zel karah ram changkang zawkte'n an hnam chìn dan leh tih dante an ngai hlu a, ram dang mite pawhin hriatpui ve se an tih ṭhin thu a sawi a, "Khawvel hmasawnna chak tak kan bawhna lamah kan Mizo hnam ziate zawi tê têin kan thlauhthla telh telh a, kan fate pawh Mizo ṭawng aiin sap ṭawng thiam zawk mahse pawi tih lohna chhungkaw tam takin an nei ta nia lang hi a pawi hle a ni," a ti.

Kazakhstan aṭang hian LN Gumilyov Eurasian National University zirlaite an lo kal a, an hnam làm an entir bakah zai leh rimawi (folk music) tumte ngaihthlak a ni. Art & Culture department aiawhin Lily Veng Cultural Club-te'n Mizo hnam làm chi hrang hrang an entir bawk.