Defence counsel-te'n nawrh an titawp

Dan bawhchhiaa puh, Court-a dinsaktu ukil nei lote aiawha ding ṭhin defence counsel-te'n an fee tihsan phûta hun eng emaw chen Court-a an din duh loh chu sorkar nen an inrem avangin an titawp a, November 28, 2016 aṭang khan Court-ah an ding ṭan.

Police-in thubuai lian tham deuh - tualthah, pawngsual, ruihhlo leh ralthuam tawlhrûk leh thil dang ṭhenkhat kaihhnawiha an man, Court-a dinsaktu ukil nei lote tan Mizoram sorkarin ukil a ruai a, Court-a an din man pawh sorkar-in a tumsak ṭhin. Defence counsel-te'n Court-a an din man chu ṭum khatah Rs. 715 a ni ni ṭhin a, chu chu Rs. 1,500-ah tihsan phûtin October 17, 2016 aṭangin Court-ah an ding duh lo a ni.

Mizoram sorkar chuan tun hnai khan defence counsel-te Court-a an din man chu an senior dan mil zela siam remin, kum 7-15 chhung thawk tawhte chu Rs. 600, kum 15-20 thawk tawhte chu Rs. 900 leh kum 20 chung lam thawk tawhte chu Rs. 1,350 zel pek a remti a ni.

Court-a thawkte chuan, hun eng emaw chen defence counsel-te Court-a an din duh loh avangin Court-in harsatna a tawk nual a, thubuai ngaihtuah loha inchhêkkhawl eng emaw zat a awm niin an sawi.