MSSA-in inkhawmpui an hmang

Mizoram Sericulture Service Association (MSSA) chuan nimin khan Sericulture conference hall-ah inkhawmpui an hmang a, Sericulture minister Dr K Beichhua'n a hmanpui.

Inkhawm hi MSSA president Lalthiang­hlima'n a kaihruai a; Sericulture Minister chuan, tam ringawt aiin, mi tlemtêin tih tak zeta hna an thawh ṭha a tih zawk thu sawiin, "District tina mi thiam pahnih pakhat lek hian tih tak zeta hna an thawh chuan Mizoram tan hmasawnna ropui tak an thlen theih ka beisei," a ti. 

Dr Beichhua chuan, a thlen phak chinah central lamah pawh ni se, Mizoram chu sericulture kalpuina atana duhthusam tih an pawm vek thu a sawi a; Mizoram ṭhatna chu a nihna anga hmang chhuak thei tur tute nge ni, tih inzâwt fo turin sericulture-a thawkte a chah.

Sericulture director Lalrozama pawhin thu sawiin, Sericulture department-a thawk zawng zawngte chu chhungkaw khat an nih thu sawiin, "Sericulture hi Mizo­te'n hmànlai aṭanga an lo kalpui tawh a nih loh avangin kalpui tak tak turin mipui thinlung hneh a ngai. Hemi kawngah hian ṭan lak a ngai nasa hle a ni," a ti.

Conference-ah hian chawhnuah MSSA member-te chuan an department leh an service kaihhnawih thil pawimawh hrang hrangte an rêl a hruaitu thar an thlang nghal a ni.