MPYCC-in ṭanrualna tichhe thei thuchhuah siam lo turin an chah

Citizenship Amendment Bill (CAB) dodalna chungchangah Congress party ṭhalaite chuan ZPM ṭhalaite chu ṭanrualna tichhe thei zawnga thuchhuah siamah an puh a, ti tawh lo turin an chah.

MPYCC chuan, November 29, 2019 zana Union Home minister Amit Shah hoa Delhi-a CAB sawihonaah political party aṭangin BJP president Dr JV Hluna leh ZPM secretary general K Sapdanga te chauh tel angin ZPM ṭhalaite'n an tarlang tih an sawi a, "Party aiawha kal ve tho Congress leh MNF party te, Mizoram hnam leh sakhua hmangaih ve loah an puh ta mai hi âtthlâk kan tiin mak kan ti hle a ni," an ti.

Congress ṭhalaite chuan, Congress party chu mahni thua kal mai loin, committee inráwn tlanga thutlukna kalpui ṭhin an ni tih sawiin, Amit Shah nena inkawmnaah pawh MPCC secretary Lalhmachhuana a tel tih an sawi a; Congress party chuan CAB chu engti hawi zawng pawhin ṭha an ti lo a, na taka an dodal zel tur thu an tarlang bawk.