Dy.CM-in Leitlangpui Rahbi Award a sem
Deputy chief minister Tawnluia chuan December 4, Nilaini khan Lunglei HPC Conference Hall-ah Leitlangpui Rahbi 2019 Award hlanna inkhawm a hmanpui a; HPC vice chairman pisaah Lungleia chanchinbumite a kâwm bawk.
Press meet-ah hian Tawnluia chuan, sorkar chu mipui ta a ni tih sawiin, "Mipui tana din a ni a, langtlang leh zêp rûk awm loa thawk tura buatsaih leh thawk mek a ni. Sorkarin thuneihna sem zâi a ngai pawimawh a, mipui hnena thuneihna tam zawk pek sorkarin a duh a, Lungleiah pawh mamawh dan leh a ṭul angin municipal board/council kalpui turin kawng a inhawng a ni," a ti; V/C-te pawh thuneihna tam zawk leh mawhphurhna sang zawk pe turin sorkarin ruahmanna a siam mek thu a sawi.
Sorkar flagship programme SEDP chungchangah Dy. CM chuan, hmalakna kaltlangin mahni ram leilung ngei aṭanga intodelhna neih chu sorkar tum bulpui ber a nih thu a sawi bawk. Press meet-ah hian Agriculture minister C Lalrinsanga, Sports minister Robert Romawia Royte, HPC vice chairman Lawmawma Tochhawng leh MLA dang Dr Vanlalṭanpuia, Dr K Pachhunga leh C Lalmuanpuia te pawh an tel a ni. Deputy Chief Minister hian Nilaini vêk khan Lunglei district chhunga sumdawnna lama ngaihtuah nei ṭha intihsiakna, ‘Leitlangpui Rahbi’ competition-a ti ṭha mi 15 hnenah lawmman a hlan bawk.
Leitlangpui Rahbi 2019, Micro Start Up Capital Competition hi June 6, 2019 khan chief minister Zoramthanga’n a hawng a; intihsiakna hi Planning department hnuaia Mizoram State Entrepreneurship Development Monitoring Committee (MEDMOC) kaihhruainaa kalpui a ni. A tum ber chu - mahni kutke a ding tura tumna leh duhna neite, sumdawnna rilru neite tana business idea hmanga intihsiakna buatsaih a ni a; project azirin Rs. 2,50,000 thleng ṭanpuina dawn theih a ni.
Leitlangpui Rahbi 2019-a ti ṭhate
1. C Lalhmangaiha, Leitlang Pictures
2. C Lalramluahpuia, OG Food Truck
3. Ramdinmawia, VB Ecofriendly Production- Bamboo Products
4. H Lalengmawia, H&T Farm (Piggery)
5. F Lalramnghinglova, Fanai Bee Farm
6. Lalṭanpuii Hnamte, Cafe 02
7. R Vanlalzami, Baw Bawih Homemade Pickle & Fruit
8. Sangkhuma Khiangte, Goat Farming
9. P Lalromawia, Jo Jo Onion Farm
10. R Lalrinmawia, Raymond School of Music
11. Vanrammawii Chawngthu, Le Blue Cafe
12. F Zohmingliani, FIFA Refree Training Academy
13. M Lalpekmawia, Mualhlun Hood Works
14. H Vanlalruatfela, RC Bag Works
15. C Lalduhawma & C Lalsiamliani, Tuition Classes