Sorkarin hnathawk tlak lote pension peka hnathawk thei ngeite lak a duh - Chief Minister

Chief minister Lalduhoma kaihhruaiin nimin khan Secretariat conference hall-ah Home department leh UDPA department-te hnathawh thlirletna (review meeting) neih a ni a; Chief Minister chuan, hnathawk tlak lote chu Special Pension Scheme hmanga pension peka, hnathawk thei ngeite lak mai chu sorkar duh dan a nih thu a sawi.

Lalduhoma chuan, review meeting hi dik lohna zawnna ni loin, kal­­phung leh tihdan ṭha zawk te, hmasawnna hna chak zawka thawh theih dan turte sawihona a nih thu a sawi a, "In ngaih­dante tlang takin sawi ula, inpawh takin mee­ting ang u. Service Review Committee nei rang turin ka duh che u a, hna­thawk tlak lote chu Special Pension Scheme hmanga pension peka, hna­thawk thei ngeite lak mai chu sorkar duh dan a ni," a ti a; office hunbi ngai­pawimawh tur leh officer-te chu an hnuaia thawkte welfare ngai­pawimawh reng turin a chah.

Home minister K Sapdanga, UDPA enkawltu ni bawk pawhin thu sawiin, "Review committee hian thawktute a tiphurin thawh­hona pawh a tiṭha a ni," a ti.

Ṭhutkhawmah hian department pahnihte dinhmun leh hmalakna hrang hrangte sawiho niin, thawktute chuan an hnathawhte leh hma an sawnna atana an ngaih pawimawhte Chief Minister hnenah hian an thlen nghal a ni.

Tarlan danin, Mizoram china km 510-a thui Indo - Myanmar ramriah Mizoram Police Station 12 a awm mek a, Assam Rifles-ten duty post eng emaw zat an nei. Mizoramah Central Force, Assam Rifles, Border Security Force, Central Reserve Police Force, Border Roads Organisation, Army Medical Corps, Army Recruiting Office leh CIJW School-te'n hna an thawk mek.

Free Movement Regime hnuaiah border pass pek ṭhin a ni a; October 30, 2025 thleng khan border pass 21,238 pek tawh niin, pass pekna hmun pathum - Zokhawthar, Hnahlan leh Zochachhuahah te a awm. Indo Myanmar ramri venhimna ṭha tak avangin ruihhlo leh dan loa kuhva lakluh a tlahniam nasa hle. Border Haat din hna kalpui ṭan a ni dawn a, Ministry of Home Affairs (MHA) duh danin Zote, Champhai district-ah pilot project kalpui phawt a ni ang.

Mizoram leh Bangla-desh ramri thui zawng hi km 318 angin MHA chuan a chhinchhiah a; Mizoram Police Station paruk awmin, BSF duty post eng emaw zat a awm a; Manipur leh Mizoram inrinaah Police Outpost pariat a awm mek bawk. Assam nena ramriah outpost 22 a awm a, ramri buai chungchanga official level meeting neih leh hun tur duan mek a ni.

Assam leh Mizoram inrina, buaina chhuah ṭhinna hmunah hian CIJW School chuan an training hmunhma zauh an dil a; state pahnih Chief Minister-te pawhin an sawi dun tawh a, Assam lamin tih tur an neihte ngaihchan mek a ni. Tripura state nena ramriah Police Outpost paruk a awm mek bawk.

ṬHUTKHAWMA TARLAN DANGTE
* ILP online portal ṭha zawk buatsaih mek a ni.
* Kumin July aṭang khan Myanmar leh Bangladesh aṭanga lo lutte biometric enrolment (Foreigner Identification Portal) kalpui ṭan a ni.
* Myanmar aṭanga rawn lut hi 58.15% leh Bangladesh aṭanga rawn lut 10. 84% ziahluh tawh a ni.
* Tunah hian Myanmar raltlan mi 31,214, Bangladesh raltlan mi 2,354 leh Manipur state aṭanga lo lut (displaced person) mi 6,953 chhinchhiah mek a ni a, a danglam ve reng.
* Council of Ministers chuan October, 2024 khan Mizoram State Human Right Commission din a lo phal tawh a, Commission dinna notification leh post 16 siamna notification tihchhuah tawh niin, rei loteah a taka kalpui a ni ang.
* SASCI aṭangin Central Jail, Central Women Jail, District Jail - Lunglei, Siaha, Champhai, Kolasib, Serchhip, Mamit leh Saitualte sak an ni.
* Saitual District Jail hi hawn theih a ni ṭep a, Mizorama jail tángte ei leh in atan thla tin cheng nuai 40 vel sèn a ni.
* Aizawl Sustainable Urban Transport Project hmangin Aizawl leh a chhehvel inkalpawhna kawngpuite nasa taka tihhmasawn tum mek a ni.
* Aizawl Traffic Management ṭha avangin 18th Urban Mobility India-ah UDPA chuan Special Award a dawng.
* Parking Facility hi MINECO-ah ṭha takin zawh tawh a ni a, Zodinah a zo ṭep a, McDonald Hill leh Venghnuaiah thawh mek a ni.
* Public Space & Facility-ah Aizawl Lungdawh zawh tawh a ni a, Aizawl Sumtual leh Aizawl Dawh-Rem pawh zawh ṭep tawh a ni.
* Aizawl City Centre, dawr 1,102 awmna, cold storage nena thuam chu Bazarah sak mek a ni.
* AR chhuahsan rama site development kalpui dan tur pawmfel tawh a ni.
* Thenzawl Peace City, Neihloh khaw thar bakah, Khawzawl leh Saitual master plan-te siam mek a ni.
* UDPA hian reform based incentives hi SASCI 2023-24 ah vbc 157 leh SASCI 2024-25 ah vbc 495.50 an hmu a, SASCI 2025 - 26 ah hian target vbc 778.50 an nei mek.
* Storm Drain hi SASCI aṭangin district khawpui hrang hrang tan tam tham tak kalpui mek a ni a, Aizawl bikah hmun 26-ah siam a ni ang.