Pathian malsawmna avanga hnehna chang thei kan ni - Dr Thangtea

Dampa bial MLA by-election neih zawh taka thlan tlin Dr R Lalthangliana chuan Pathian malsawmna avanga hnehna chang an nih thu a sawi.

Dr R Lalthangliana hian nimin khan by-election ah hnehna an chan avanga Pathian leh Dampa bial mipui hnenah lawmthu sawiin, Ṭuahzawl, West Phaileng, Kawnmawi, Chhippui leh Lallen te a tlawh a; Ṭuahzawlah hian by-election inthlan result puan hnua ZPM VCP hoa MNF-a a lawmluh VC member-te nen an inkawm.

Dr R Lalthangliana chuan an chakna chan chu amah leh an party chakna a ni lo tih sawiin, "Pathian malsawmna vang chauha hnehna chang kan ni a, chapo thei kan ni lo. Rilru thianghlim leh rilru hrisel hi mi tinin i pu ṭheuh zawk ang u. Min thlangtu chauh ni lo, khawvel hmun hrang hrang aṭanga min ṭawngṭai puitu zawng zawngte chungah ka lawm hle. Lo vanduai ta party dang candidate leh worker zawng zawngte ka tawrhpui a, an kal zelna turah duhsakna sang tak ka hlan nghal," a ti.

Dampa Bialtu MLA chuan an campaign laia mi rilru tihnatte a awm a nih chuan ngaihdam a dil thu a sawi a,"Unit, block leh campaign committee-te pawh in duhthusama kan ngaihsak hman tawk lohnaah ngaihdam ka dil a che u," a ti a, MNF campaigner leh party dang campaigner zawng zawngte pawhin harsatna leh buaina lian tham an tawk lo nia a hriat avangin Pathian hnenah a lawm thu a sawi bawk.