KHAWTHLIR

Award dawng

Rajya Sabha MP K Vanlalvena chu tun thla tir lama Malaysia khawpui, Kuala Lumpur-a 'Global Leaders Award Conclave and Summit 2025'-ah a tel a; Global Leaders Award a dawng. K Vanlalvena'n award a dawnah hian 'India hmarchhak, Myanmar, Bangladesh-a tribal-te'n kum 2021-23 chhunga harsatna an tawh chungchangah anmahni thlavang hauhna kawnga hna thawh ṭhat lawmman leh chawimawina' tih a inziak a ni.

Kolkata-ah pastor a thi

Badu, Calcutta Mission Field bialtu pastor Rev. Lalrindika (50), Kawrthah chu nimin chawhma dar 10:15 khan a thi. Rev. Lalrindika hi a fate sikul a thlah hawlam a tlu a, damdawi-in panpui nimah se, chhan theih a ni tawh lo. A ruang hi vawiin hian thlawhtheihna hmangin Silchar rawn panpui a ni ang a, Silchar aṭangin motor-in Mizoram rawn panpui tum a ni.

PM-Kisan

Prime minister Narendra Modi chuan nimin khan PM-Kisan instalment 21-na cheng vbc 18,000 chu Coimbatore, Tamil Nadu-ah a tlangzarh a, South India Natural Farming Summit, 2025 a hawng nghal bawk. PM programme hi Siaha leh Khawlzawla KVK-a thawktute leh kut hnathawktuten online kaltlangin an chhim a; PM-Kisan hi kum 2019 aṭanga kalpui ṭan niin, nimin thleng khan kut hnathawktute bank account-ah cheng vbc 3,90,000 pek a ni tawh.

NMBA

India ram pum huap ruihhlo do beihpui thlakna, Nasha Mukt Bharat Abhiyaan (NMBA)-in kum nga a tlin pualin nimin khan Lunglei DC conference hall-ah additional DC Zoramdini kaihhruaiin hun hman a ni a; Police, Excise & Narcotics, District Legal Services Authority (DLSA) leh Sub-Headquarters YMA te'n ruihhlo do kawnga hma an lak tawh dan leh an hmachhawpte an tarlang a ni.