EduTech Fest & Career Fair 2025 AI hmang thiam an dingchang dawn - Education Minister

School Education minister Dr Vanlalthlana chuan nimin khan Chaltlanga State Council of Educational Research & Training (SCERT) kawtzawlah ni hnih awh tur 'EduTech Fest & Career Fair 2025' a hawng. EduTech Fest & Career Fair 2025-ah hian zirna atana technology hman ṭangkai theih dan chi hrang hrang pho chhuah leh inhrilhfiahna stall 22 hawn a ni.

Dr Vanlalthlana chuan, technology hman ṭangkai thiam chu ram pum hmasawnna tur a nih thu a sawi a, "Artificial intelligence (AI) leh technology hmang thiam chu an dinchan dawn avangin hemi mila zirna her rem a, mahni intuaihriam a ngai. Kan literacy rate sang mah se, thiamnain a umzui loh chuan awmzia a awm lo. PARAKH exam-ah Mizo zirlaite’n state danga an zir rualpuite an tluk loh hle avangin ṭan lak a ngai a ni," a ti.

World Economic Forum chhût dan chuan kum 2030-ah AI chuan khawvel pumah hna maktaduai 85 a luahlan dawn tih sawiin Education Minister chuan, "Hna thar maktaduai 97 vel a siam dawn anga chhut a ni a, tuna zirlaite hian AI nen hna in inchuh dawn avangin tunlai mil thiamna – digital literacy, communication skills, financial literacy leh tourism ṭhang zel dawnsawn nan social skills leh hospitality lam bawh zel ang che u," a ti a; mahni kutkawiha ding thei, mi rawih ni loa mi ruaitu, hna zawngtu ni lova hna siamtu ni tura inpuahchah thiam zel turin zirlaite a chah bawk.

Education Minister hian Lalhruaitluanga ziah ‘Zirna Lamtluang: Roadmap to Higher Education’ tih lehkhabu copy 15 chu fest chhunga sem turin SCERT hotute hnenah a hlan nghal a ni.

Khualzahawm Malsawmzuala Ralte, MYC chairman chuan, "Tunlai khawvelah entrepreneurship development leh skill development-te a lar ta hle a, mahni kutke, ngaihtuahna fim hmanga thil siam chhuak, duang chhuak, thil awm tawhsa hmang ṭangkaia taima taka beitute chu sang takah an invawrh ṭhin, " a ti a; zirlaite chu theihna inang vek nei an nih thu leh an thawhrimna leh tumruhnain danglamna a siam dawn thu a sawi.

MYC Chairman tarlan danin, MYC-in coaching class chi li an kalpui aṭanga zir chhuak mi 94-te chu sorkar hnaah an inziahtling tawh a, British Army form an fill up-pui zinga mi panga tlingin, India–Taiwan Labor Mobility Agreement 2024 hnuaiah Mizo ṭhalai 50 chu Taiwan-a hna thawk tura thawn an ni dawn. Japan-a caregiver tur te, Germany-a nurse tur te, India rama hotel changkanga spa therapist hna thawk tur engemawzat thawn chhuah an nih tawh bakah, Food and Beverages Training Programme an kalpui ṭhin bawk.

EduTech Fest & Career Fair 2025 hawnna inkhawm hi SCERT director Caroline Zoramthangi'n a kaihruai a; Lunglei West bialtu MLA T Lalhlimpuia pawhin thu a sawi. Ni hnih awh tur EduTech Fest & Career Fair chhim tur hian sikul 42 sawm an ni.