CM-in Railways Minister a kâwm

Chief minister Zoramthanga chuan December 4, Nilaini khan Union Railways minister Piyush Goyal, Commerce & Industry minister ni bawk chu a pisaah a kâwm a, Mizoram mamawh hrang hrang a sawipui.

Chief Minister-in Bairabi aṭanga Sairang thleng tur rél kawng siam mek chu tihpuitlin thuai a ṭul thu a sawi chung­changah Railways Minister chuan, kum 2022-ah chuan zawh hman ngei tum a nih thu a sawi a; chak zawka hna thawh a nih theih nan rél kawng siam hna thawktute leh state sorkar chu ngun zawka inhmukhawm ṭhin turin leh harsatna awm theite sawiho ṭhin turin a lo chah.

CM chuan, Zokhawthar Land Custom Station chu thawm ṭhat a tul thu leh Ṭiau luia bailey bridge chu RCC bridge-a thlak a ṭul thu a sawi a; Kawrpuichhuah (Tlabung) leh Zorinpui, Lawngtlai district-ah pawh land custom station changtlung tak din a ṭul thu a hrilh. 

Piyush Goyal chuan, Mizoram Chief Minister thu thlente chu sorkar laipui pawhin a ngaih pawimawh thu leh a lo bawhzui zel tur thu a sawi. CM Zoramthanga hi Planning Board vice chairman H Rammawi, chief secretary Lalnunmawia Chuaungo leh official dangte'n an ṭawiawm a ni.