Yashoda Group of Hospitals-in MUHCS an zawm

Yashoda Group of Hospitals, Hyderabad hotute chuan nimin khan Aizawl Press Club-ah thuthar thehdarhtute an kawm a; Mizoram Universal Healthcare Scheme (MUHCS) an zawm thu leh MUHCS-a inziaklutte chu scheme-in a huam chinah pawisa sen ngai loa an enkawl theih thu an sawi.

Yashoda Hospitals hotute chuan, Mizoram mipuite'n khawvel elpha hriselna lama inenkawlna ṭha an dawn ve theih nan MUHCS an kalpui ve thu an sawi a, "Yashoda Hospitals, Hyderabad-a inentirte chuan MUHCS kaltlangin pawisa sen ngai lo (cashless) leh a thlawnin inenkawlna an dawng thei a, specialist care hrang hrang - cardiology, oncology, neurology, nephrology, pulmonology, gastro surgery, orthopaedics leh department changtlung tak tak a awm," an ti.

Aizawlah Yashoda Hospitals chuan OPD service & help desk an hawn thu te, Hyderabad-a an damdawi-in pan turte an buaipui theih thu leh airport aṭangin an kal lam leh haw lam an hruai theih thute an sawi bawk.