Hmasawnna a rualkhai loh chuan Hlim tlân loh a hlauhawm - CM Hawla

Chief minister Lal Thanhawla chuan, hmun kilkhâwr leh hmun lailia awmte'n rualkhai taka hmasawnna an neih a pawimawh thu a sawi a, "Intluktlânna kan neih loh chuan kan ram hi kan hlim tlang lo ang tih a hlauhthawnawm a ni," a ti.

Chief Minister hian nimin zing khan AH&Vety department-in Lawngtlai district-a Mampui rama ár note awp keuna tur Hatchery Farm, bawng no vulh puitlinna tur Calf Rearing Farm leh vawkpui vulh aṭanga a note tihpunna tur Pig Multiplication Farm a hawnnaah thu a sawi a ni.

Lal Thanhawla chuan, ram leilung fate chu Mizoram khawi hmunah pawh awm se, a neitu nihna leh mawhphurna inchen nei vek an ni tih sawiin, "Ram leilung fate tan inthlahrunna leh inkiltawihna tur a awm lo a, hmun kilkhâwr leh hmun lailia awmte'n rualkhai taka hmasawnna kan neih leh a thlen a pawimawh. Intluk tlanna kan neih loh chuan kan ram hi kan hlim tlang lo ang tih a hlauhthawnawm a ni," a ti.

India independence hmain Mizoram leh Mizote chhuahká ber chu chhim lam ni ṭhin mah se, chhan hrang hrang vangin hmar lamah chhuahkâ a awm ta tih sawiin CM Hawla chuan, "Chhim lam chhuahká a nih leh thei nana hmathlir thui tak sorkarin a neih ṭhin chu UPA leh NDA sorkarin phûrpuiin, Look East leh Act East Policy-ah an khung a ni," a ti a; sorkar laipuiin inkawlpawlhna leh insumdawn tawna an ngaih pawimawh thu a sawi.

Kaladan Multi Modal Transit Transport Project kaltlangin chhim lam chu Mizoram chhuahká ber atan buatsaih mek a ni tih sawiin Lal Thanhawla chuan, "Keini ai zawkin a hmang tangkai tur kan ram
ṭhenawmte hi an phûrin an ngaihven a, a puitlin hun tur an nghakhlel hle a ni. Act East Policy hnuaia ruahmanna hrang hrangte ṭha leh hlawk zawka kan dawnsawn theih nan a bik takin chhim lama cheng Lai, Mara leh Chakma unaute hian in rilru leh ngaihtuahnate in buatsaih a ṭul," a ti.

Chief Minister chuan, Lai rama Chanchin Ṭha a thlenna hmun hmasa ber Mampuiah AH&Vety department hmalaknaa ran tihpunna din thar pathumte chu chhim lama hmasawnna méllung pawimawh tak tukna nih thu sawiin, ran vulhtu mamawh phuhrutu leh malsawmna thlentu an nih ngei a beisei thu a sawi bawk.

Inkhawm hi AH&Vety minister C Ngun-lianchunga'n a kaihruai a; minister Zodin-tluanga leh PC Lalthanliana, parliamentary secretary H Zothangliana, MLA Vanlal-awmpuii Chawngthu leh LADC chief executive member VL Hmuaka te pawh an tel.

Hatchery farm hi Social Welfare depart-ment kaltlanga Ministry of Tribal Affairs
ṭanpuina sum nuai 125 hmanga din a ni a, thla tin ar note 5,000 vel awp keu thei tura buatsaih a ni. Siaha leh Lawngtlai district-a ar vulhtute'n ar note an mamawhna a phuhrûk theih beisei a ni.

Bawng no vulh puitlinna hmun Calf Rearing Farm hmunhma chu cheng nuai 29.90 sênga siam niin, bawng no 50-a bul ṭan a ni a, National Programme on Bovine Breeding sum hman a ni.

Strengthening of Piggery Farm hnuaia Pig Multiplication Farm hi cheng nuai 34 sênga siam niin, vawkpui 50 hmangin bul ṭan a ni a, nakkumah vawkpui 30 dang dah belh leh tum a ni. Hna thawhna sum hi Ministry of Agriculture & Farmer's Welfare hnuaia National Livestock Mission-in an tum a ni.