Career Guidance Campaign khâr

Zirlai naupangte'n zirna kawng an zawh zel dan tur an thlan thiam theih nana Kolasib Officers Club (KOC)-in Career Guidance Campaign 2016 an buatsaih chu, nimin khan Parish Hall, Kolasib-ah khâr a ni a, School Education minister H Rohluna'n a hmanpui.

School Education Minister chuan, KOC-te'n zirlaite hmakhua ngai a, an kawng zawh tur an thlan thiam theihna tura hma an la chu chhuanawm a tih thu leh lawmawm a tih thu a sawiin, "District dangte paw'n KOC tih dan entawna hma an lak ve ka beisei," a ti a; zirlaite chu kawng kawhhmuhtu
ṭha tak an neih avanga an vanneihzia hria a, an thu ngaihthlakte tihpuitlin tum turin a fuih.

H Rohluna chuan, zirnaah pakhatna ni mai a tawk lo tih sawiin, "Pakhatna nih mai duhtawk lo a, state dang zirlaite nena inel pha tura mark sang tak hmu thei tura ṭang a, thiamna tak tak pawchhuak thei turin theihtawp chhuah a pawimawh," a ti.

Career Guidance Campaign hi September 2016-ah ṭan a ni a, Kolasib khawpui chhunga sikul pasarihah neih a ni. KOC member aṭangin DIET principal Vanlalmawia, SIRD core faculty Dr Lalhruaitluangi leh Kawnpui SDO(C) Lal-hmingliana ten zirlaite chu thil pawimawh hrang hrang an zirtir ṭhin a ni.