KHAWTHLIR

Rokunga Rimawi Kût

Vawiin chawhnu dar 1-3 hian Sipai Lammualah Rokunga Rimawi Kût 2016 buatsaih a ni dawn. He hunah hian Rokunga hlate band party hrang hrangin tawtawrawt leh baja-in an ham dawn a, en man a awm lo a, a duh apiang en turin an sawm.

Thisen pe

Republic Higher Secondary School chuan nimin khan Aizawl Civil Hospital tan thisen unit 44 an pe a, a petute mipa 33 leh hmeichhia 11 an ni. 166 Bn. BSF, Serchhip Dawngzawla mite'n nimin khan blood donation camp an huaihawt a, Serchhip District Hospital tan thisen unit 25 an pe. Sairang Dinthar Bial KṬP pawhin nimin khan Synod Hospital tan thisen unit 14 an pe a, a petute mipa 12 leh hmeichhia pahnih an ni.

UPC android app.

Mizoram UPC general headquarters-in android application an siam thar chu nimin khan Mizoram UPC office conference hall, Tuikhuahtlangah general superintendent Rev. Ngurthanpara Sailo-in Pathian hnenah hlanin a tlangzarh. Mizoram UPC Media & Publicity Board-in andriod application an siamah hian Mizoram UPC telephone directory, thu thar, article leh thil dangte dah a ni.

Excise duty dawn

Krismas leh kumthar hlim taka mipuiin an hman theih nan Excise & Narcotics department chu Aizawl khawpuiah ngawrh takin an duty dawn. END chuan, mipuite chu END enforcement duty-te lo pui turin an ngen a, dan bawhchhia an awm chuan telephone no. 0389-2320810 ah hriattir zel turin mi tin an ngen .

Lehkhabu thar

Aizawl Observer editor, E Lalhleia lehkhabu buatsaih, ‘Tunlai khawvela Pathian thu pawimawhnate’ tih chu nimin khan Aizawl Press Club-ah tlangzarh a ni.

Chanchinbu man

Mizoram Chanchinbu Sem Association chuan thuchhuah siamin, tunlaiin pawisa nâwi kîr tur a ván avangin chanchinbu manah pawisa nâwi pe hrâm turin mipui an ngen.