Police-in lirthei siam man bá an ngah
Mizoram police-a headquarters, district tin SP office, battalion hrang hrang leh CID unit hrang hranga police-te'n an lirthei kawl a chhiata a siamna man bá eng emaw zat an nei hlawm a; motor workshop-a an bat zat chu an chhût mek.
Police hotu hrang hrangte aṭanga thu dawn danin, Policete hian lirthei an kawlte chu a chhiat chángin workshop-ah an siamtir ṭhin a; workshop-a motor siamna man ba an neih zat belhkhawm chu cheng nuai 100 chuang fé a ni turah an ngai.
Tun dinhmunah SP office ṭhen-
khat chuan motor siam man leibá cheng nuai 26 te, nuai 15 te, nuai 10 te, nuai 12-te an ba deuh fur a; mahse, Finance department-in an ngen angin, police hotu liante chuan hmun hrang hranga sum an bat zat chu an chhût mek nia thu dawn a ni.
Sum lama harsatna a awm reng avangin motor workshop bill bá chu a inchhêk khâwl zel a, district pakhatah phei chuan workshop-a motor siamna man an pe nghal zel a nih loh chuan workshop neitute'n an siamsak thei tawh lo niin an sawi. Sorkar kal tawh zawng zawngin budget-ah police-te tan sum a dah tam theih loh avangin leiba chu an inrochun zel niin an sawi bawk.
Kum 2000 aṭangin mumal takin Police Modernisation Scheme kalpui a ni a, Police Modernisation Fund aṭangin lirthei la lei zauh zauh mah se, Central lam an khawng avangin motor hluihlâwn tawh thlakna atan chauh lei phal a ni a, a hlui thlakna tur lo chu lei phal a ni lo. Police Modernisation Scheme aṭangin kum khatah cheng vbc. 4.92 dawng ṭhin mah se, state sorkar aṭangin lirthei an lei lohna a rei tawh hle niin an sawi.
Police-te hna thawka an kal chhuah chángin TA/DA bill chungchangah harsatna an tawh nasat avang leh hna ṭula an kal chhuah laia mipuiin an mamawhna dangah duh anga an kal vek theih loh avangin an harsatna inphûm rû tam tak chu mipuiin an hriatthiampui se an duh hle tih an sawi.
Mizoramah police station 38 leh outpost 12 a awm mek a, PS leh outpost-te'n lirthei dawng kim vek tawh mah se, an ngah tawk loh avangin harsatna an tawk zauh zauh ṭhin.
Pawi khawihna hmuna kal a ngaih changin, lirthei leh petrol-ah harsatna a awm vanga an kal theih loh thuthang awm chu district hrang hranga police hotute zawh kual a ni.
District pakhata SP chuan, hetiang thâwm hi a awm ngei thu a sawi rualin, a dik tâwk loh thu a sawi a; district SP pakhat dang chuan, "Mipuiin harsatna an tawh a, motor kan nei remchang lo a nih pawhin taxi emaw, auto-rickshaw emaw kan hmantir a, a hnuah kan inpe leh mai ṭhin a, harsatna kan tâwk lem lo," a ti.
Police station leh outpost-te chu sorkarin thla khatah petrol litre 60 hmang thei turin a bituk a, renchem thei ang berin an hmang ṭhin niin a sawi hlawm.
Police hotu ṭhenkhat chuan, an dinhmun dik tak leh an harsatna tawh ṭhinte chu mipui leh tlawngai pawlte'n an hrethiam tâwk lo niin an sawi. An naute'n Court-ah tángte an hruaiin, tángte chaw eina man an tumsak cháng a awm thu te, thla khatah Aizawlah jail tángte Court tur chu ṭum hnih an hruai deuh ziah a ngaih avangin an sum neih dan nen an buai ve hle ṭhin thute an sawi a ni.
Tlawmngai pawl leh kohhran inkhawmpui lian emaw a awmin police-te chu an awmna police station aṭanga khaw hla tak takah duty tura ngen an nih laiin, an riahna tur te, an ei leh in tur te, an kalna petrol man leh ṭul pawimawh dangte an ngaihtuah-pui tâwk loh avangin an buai phah ṭhin hle niin an sawi.
Police hotute sawi danin, district SP office ṭhenkhat chuan TA/DA bill atan thla thum (quarter khat) atan Rs. 50,000 te, Rs. 60,000 leh a nei tam zualin Rs. 1,00,000 velte an nei a; an district ṭheuha police station leh outpost zawng zawngin an inṭâwm avang-in harsatna an tâwk ṭhin.
TA/DA rules-ah police-te chu an awmna station aṭanga km. 6-a hlaa an kal a, darkar 8 an duty chuan TA/DA bill tur tih ni mah se, an sum neih chu hotu liante tan ringawt pawh indaih ngaihna a awm loh avangin district pakhata police zawng zawng TA/DA atan hman ngaihna a awm lo niin an sawi.
Police station leh outpost
District PS Outpost
Aizawl 9 2
Lunglei 6 2
Siaha 3 3
Lawngtlai 5 2
Serchhip 3 Nil
Champhai 3 1
Kolasib 4 1
Mamit 5 1