YMA-te oxygen concentrator hlan

Aizawl West-II bialtu MLA Lalruatkima chuan, November 29, 2016 zan khan a bial chhunga YMA branch-te hnenah MLA fund sum hmanga lei oxygen concentrator khawl pakhat ṭheuh a hlân.

Oxygen concentrator hlanna inkhawm hi Tuikual South YMA Committee Room-ah neih a ni a; Lalruatkima chuan, Mizoram sorkarin MLA fund a tipung tih sawiin, "MLA fund-te hi kan khawtlang tana ṭangkai taka hman tur a nih angin, khawtlangin a mamawh nia kan hriat avangin hetiang hian kan ti a ni," a ti.

Oxygen concentrator-te hi YMA branch paruk - Tuikual North, Tuikual South, Dinthar, Dawrpui Vengthar, Kanan Veng leh Vaivakawn branch-te'n an kawl ang a, an veng chhunga a mamawhte'n an duh hunah a thlawna an hman theih tura tih a ni. Pakhat Rs. 55,000 man a ni.