Himpuia leh DoNER Secy. an inkâwm

Parliamentary secretary (School Education) Joseph Lalhimpuia chuan, November 28, 2016 khan New Delhi-ah DoNER secretary Naveen Verma chu a pisaah a kâwm a; Lungleia Education Complex din chungchang a sawipui.

Sorkar thuchhuah tarlan danin, Mizoram Education Reforms Commission rawtna angin, Education Complex hi Mizoram sorkarin ngai pawimawhin, state project priority-ah a dah. DoNER pawhin hmalak tur (retained project) zingah a thlang a, mahse, DoNER-in guideline thar an hman leh avangin DoNER project DPR-te endiktu, Wapcos pawmpuina nghah mek a ni. Wapcos-in a pawmpui hnuah state sorkar phalna lak leh a ngai.

Joseph Lalhimpuia chuan DoNER Secretary chu Lunglei Chanmari Hall (indoor stadium) sak mek chungchang pawh sawipuiin, third instalment pek an nih chuan sak zawh mai theih a nih thu a hrilh a, pawisa bâng chu pe chhuak thuai turin a ngen.

Sorkar thuchhuah tarlan danin, Naveen Verma chuan hall sak mek chu amah ngeiin a hmunah a hmuh thu sawiin, a sak dan pawh ṭha tawk a tih thu a sawi a, "June 2016 report anga pawisa pek tur pek tlak tawh a ni a, hna thawh zawh chin report a nih veleh pawisa la bâng chu pek chhuah nghal tum a ni," a ti.