Goa-a Mizote'n an mamawh huna an koh theih tur ruahman a ni

Tourism minister Lalnghinglova Hmar chuan November 19, Nilaini khan Goa chief minister Pramod Sawant leh Tourism minister Rohan Khaunte a kawm a; Chief Minister nen hian Goa-a Mizo hnathawkte'n an mamawh huna koh theih tur an ruahman.

Lalnghinglova Hmar chuan Goa Mizo Welfare survey aṭangin Goa-ah Mizo 1,500 dawn an awm tih Goa Chief Minister hi hrilhin, "Goa hi Mizoram mai bakah Northeast state dang ṭhalai sing chuang tana eizawnna siamsaktu a ni a, a lawmawm hle," a ti a, Goa-a Mizo leh hmar­chhak mi hnathawkte himna tur leh mamawh huna an koh theih tur Goa sorkarin siam tura rawtna a thlen.

Tourism Minister chuan Mizoram chu khualzinte tana pan chakawm leh leh mawi, tourism lama hmasawn mek a nih thu sawiin, "A ram leilung mawina bakah tlang leh ruamte adventure tourism leh sports tourism tan pawh remchang leh theihna zau tak nei a ni. Goa hi India rama tourism lama a hmahruaitu a nih angin state pahnihte thawhdunnain hmasawnna a thlen ka beisei. Goa aṭangin thil tam tak zir theih a nih ang," a ti.

Goa Chief Minister chuan tourism lama thawhhona chu a taka kalpui theih a nih tur thu sawiin, Mizo leh hmarchhak aṭanga hnathawkten harsatna an tawha an biak pawh tur Chief Minister Office-ah a ruat nghal a, Mizoram Tourism Minister nen a inhmelhriattir. Goa Mizo Welfare htuaitute nena inhmelhriattir zui turin CMO-te hi a chah nghal.

Goa Tourism Minister nen an inkawmnaah Lalnghinglova Hmar chuan Goa-in tourism atana digital platform hrang hranga a neihah Mizoram-a tourism hmunhma leh event tarlan ve te, tourism leh hospitality lama exchange programme neih te, tourism kaihhnawih skill development lama thawhdunte bakah state pahnih tourism tihlar kawnga thawh dun chungchangah rawtna a thlen.

Rohan Khaunte chuan Mizoram Tourism Minister chu thawhdun theihna an neihte chu zirchianga tihhlawhtlin ngei an tum tur thu a lo hrilh a, hmalak chhunzawm dan turah state pahniha Tourism department hotute lo indawr chhunzawm se, an ti.