KHAWTHLIR

Halpuah khap

Hnahthial district magistrate K Vanlalruati chuan thupek chhuahin, kumin Krismas leh kum thar 2026 lawmna vuakvetah halpuah, halmawi leh boruak ṭha lo siam thei te, sky-lantern leh silai lem a mu kap chhuak thei chite zawrh, hralh leh hman khap a nih thu a puang a; thupek zawm lote chu BNS 2023 Section 223 hmanga hrem theih an nih thu a tarlang.

Zo Zan

Goa Mizo Welfare chuan November 19, Nilaini zan khan Zo Zan an hmang a, Tourism minister Lalnghinglova Hmar-in a hmanpui. Tourism Minister chuan Goa-a hnathawk Mizo ṭhalaite chu mi state-a cheng an nih anga mawi taka awm tur leh, Mizoram lama an chhungte ngaihsak thiam turin a chah.

Heroin leh meth an man

Excise & Narcotics department leh 191 BSF ṭangkawp chuan November 19, Nilaini tlai dar 4:24 khan Tuikhurhluah methamphetamine kg 14.905 leh heroin gram 707 an man a, a neitua puh Nangsianmuanga (21) s/o Kamsuanmuang, Khawmawi, Myanmar leh Nangsiansiam (18) s/o Zamthawnkim, Chin State, Myanmar-a khawsa nia inchhalte pawh an man nghal. Ruihhlo an mante hi Myanmar aṭanga lak, state pawn lama tihral tura ruahman a ni.

Kum 50 tlin lawm

Ngopa MHIP chuan nimin khan an kum 50 (golden jubilee) tlin Ngopa Jubilee Hall-ah an lawm a, bialtu MLA F Rodingliana, minister of state-in a hmanpui. F Rodingliana chuan hmeichhiate chu Mizo cultural identity atana mi pawimawh an nih thu sawiin, hmeichhiate himna leh khawtlang ralmuang tak neih zel nan Pathian malsawm tlaka hma la zel turin MHIP member-te a chah.

MPF-te kawm

LADC inthlanpui December 3, 2025-a neih tur pualin nimin khan Lawngtlai district election officer Donny Lalruatsanga kaihhruaiin Lawngtlai district Mizoram Peoples' Forum (MPF) hruaitute leh election agent-te an ṭhukhawm. Inthlanna felfai leh thianghlim a awm theih nana hmalak dan turte an sawiho.