Minister-in chhungkaw enkawl kawnga ṭan la thar turin MHIP-te a chah

Social Welfare, Women & Child Development minister Lalrinpuii chuan, fa puitling leh hmantlak chherchhuak tur leh chhungkaw enkawl kawngah ṭan la thar ṭheuh turin MHIP member-te a chah.

Nimin khan Mizo Hmeichhe Insuihkhawm Pawl (MHIP) chuan Vanapa Hall-ah Special Assembly an nei a; minister Lalrinpuii'n hmanpuiin, Mizo hmeichhiate chu an dinhmun a san chhoh zel rualin an mawhphurhna pawh a sang chho ve zel tih a sawi a, "Ruihhlo laka kan tu leh fate an filhim theih nan leh kan hnam a ṭhan zel theih nan hmeichhiate kan pawimawh a, chhungkuaa lêtleh (back to the family) tih thupuia hmanga fa puitling leh hmantlak chherchhuak tur te, chhungkaw enkawl kawngah ṭan la thar ṭheuh ang u," a ti.

Lalrinpuii chuan MHIP chu hmeichhe chanhai leh riangvaite tana innghahna tlak, rahbi tleute tana leirem an rah chho theihna tura puitu leh chhawmdawltu ni zel turin a chah a, "MHIP-ah hian politics la lut lo ila, pawl thianghlim leh mawi tak ni zel ang u," a ti a, ngun taka ngaihtuahna senga rorel turin duhsakna a hlan.