Hmeichhe naupang khuaikhemtu Court-in kum 10 tang turin a hrem

Kolasib Fast Track Court judge R Vanlalena chuan hmeichhe naupang kum 10 mi khuaikhemtu H Khupa (70), Vairengte Field Veng chu kum 10 chhung jail tang tur leh Rs 5,000 chawi turin a hrem. Pawisa hi a pe thei lo a nih chuan kum 1 dang a tan belh ang.

June 6, 2021 khan nu pakhat chuan Vairengte Police Station-ah FIR theh lutin a fanu kum 10 mi chu H Khupa, Vairengte Field Venga cheng ṭhin chuan kum 2017-2018 chhung khan ṭum eng emaw zat a pawngsual niin a sawi. He thubuai hi Vairengte Police-te chuan chhui zui nghalin pawngsualtua puh H Khupa chu an man nghal.

Hmeichhe naupang hi doctor-in a hmuh danin sex kaihhnawiha khawih chingpen ngei a ni tih hriat a ni. Police officer-te'n thubuai chhui hna an thawh zawh hnuah chargesheet chu Kolasib Fast Track Court-ah September 29, 2022 khan an theh lut. H Khupa hi man anih aṭanga hun eng emaw chen hnuah kum upa lamte a nih avangin court-in bail-in a chhuahtir lailawk a ni.

He thubuai hi Fast Track Court Judge-in a rel chhung zawng khan thuhretu atan khuaikhem tawktu hmeichhe naupang leh case IO te, medical officer leh thuhretu dangte chu court-ah exam vek an ni.

Judge R Vanlalena chuan ngun taka a ngaihtuah hnuah Khupa hi kum 10 chhung jail a tang tur leh Rs 5,000 chawi turin a hrem ta a ni.