Lunglei district-a vawksa man tur bithliah; A misa leh a ti ṭha pawh ni se kg. 1 Rs 450

Lunglei District Level Committee on Fixation of Price of Meat, Vegetables and Fruits chuan Lunglei district-a vawksa man atan kg. khat Rs 450 turin a rel a; rate bithliah anga sa zuar lo leh bûk tling lo zuarte lakah hremna lehkkawh theih a nih thu tarlan a ni.

Lunglei additional DC Zoramdini kaihhruaia nimina District Level Committee on Fixation of Price of Meat, Vegetables and Fruits ṭhukhawm chuan Lunglei district-a vawksa zawrhna leh hralhna tur man an bithliah thar a; vawksa chu a misa emaw, a ti ṭha lai bik emaw pawh thliar loin kg. khat Rs 450 man ni se, an ti. Kg khatah hian a misa leh a kawchhungte pawh a tel theih tho avangin leh a hranpaa a sa ṭha pawh thliar loin a man hi hrut rual mai ni se, an ti a; an thurelte hi kum thar lamah a ṭul anga thlirho leh an rel.

Ṭhukhawm chuan bûk tling ngeia vawksa hralh a nih theih hmalak an rel a, a en zui turin Commerce & Industries, Legal Metrology, Police leh Local Council-te ruat an ni. Sorkarin dan a neih angin rate bithliah anga sa zuar lo leh bûk tling lote chungah hremna lekkawh theih a nih thu leh sorkar building-a inzuar an nih chuan an seat cancel-sak theih an nih bakah Rs 1,000 chawitir theih an nih thute tarlan a ni.

District Level Committee chuan thlai leh chawhmeh dang pawh a funnaa fun loin, a bûk ngeia hralh theih ni se an duh thu an sawi a, hetiang tur hian a ṭul anga inzirtir ni se, an ti bawk.