Minister-in MSSA inkhawmpui a hmanpui

Mizoram Secretariat Service Association (MSSA) chuan nimin khan Woodland Hills, Aizawlah General Conference vawi 20-na an hmang a; minister C Lalsawivunga'n hmanpuiin, MSSA member-te chu an hnathawhnaah Kristian-te tih àwma mawi (ethics) vawng nung zel turin a chah.

C Lalsawivunga chuan, MSSA member-te chu sorkar kutke pawimawh an nih thu sawiin, ram leh hnam tan hmasawnna tura thawk chhunzawm tur leh ngaihtuahna seng zel turin a fuih a, "Sorkar inrelbawlna rules leh procedure a taka hre ber leh hmang nasa ber in nih ang ngeiin sorkar ṭha siamna kawnga hmahruaitu ni ula, in hnathawhnaah Kristian ethics vawng nung zel ang che u," a ti.

Mipui tana thawk an nihna hre reng tura chahin Minister chuan, "Dikna leh rinawmna nen ṭhahnemngai takin thawk zel ang che u," a ti a; association-in sorkara an thil thlente sorkarin a hriat thu leh a ngaih pawimawh thu a sawi.

MSSA general conference hi an president Betsy Zothanpari Sailo, IPRS secretary ni bawkin a kaihruai a; member thi pahnih sûnna hun hman niin, infuihtharna, rorel leh hruaitu thar thlanna neih a ni. MSSA-ah hian member 261 an awm mek.