Governor-in convocation a hmanpui

ICFAI University Mizoram chuan nimin khan an auditorium-ah convocation vawi 13-na an hmang a; khuallian Governor Gen. Dr Vijay Kumar Singh chuan zirlai 242 hnenah degree hlanin, zirlaite chu hna thiam, thil thar ṭha zawk thlentu leh khua leh tui ṭha nih tum turin a fuih.

Governor Gen. Dr Vijay Kumar Singh chuan, convocation chu zirlaite beih hram hramna, inpekna leh hlawhtlinna chan lawmna a nih thu a sawi a, "Hlawhtlinna tak tak nei turin taimakna, dikna, rinawmna leh thiamna tak tak neih a pawimawh a, hmalam hunah chona tam tak in la hmachhawn dawn avangin lo inpuahchah lawkin, degree dawn mai duh tawk loin thiamna tak tak neih tum ula, hna thiam, thil thar ṭha zawk thlentu leh khua leh tui ṭha nih tum ang che u," a ti.

Mizorama zirna sang zawk leh industry kaihhnawih zirna tihhmasawn kawnga ICFAI University hmalakna fakawm a tih thu sawiin Governor chuan, "Tun hnaia english leh management-a Ph.D programme kalpui ṭan a ni leh doctoral programme tihlen zel in tum hi a lawmawm hle. Heng bakah hian India ram hmasawn leh intodelh (Viksit Bharat @2047) puitlin thei turin thiamna leh hnathawh tur tinzawn course kalpui kawngah ṭan la zel ang che u," a ti a; inrintawkna leh inthununna nen hmalam pan zel turin zirlaite a fuih.

ICFAI University, Mizoram Convocation-ah hian academic discipline hrang hrang 15 (UG 5 leh PG 10) hnuaia zirna programme zofel zirlai 242 hnenah degree hlan a ni a; heng zinga 212 hi post graduate niin, midang 30 chu under graduate an ni. Gold medalist 12 hnenah Governor hian medal leh certificate a hlan a; Honorary Doctorate Degree dawngtu mi pathum - Sangthankima, Dr C Dothanga IPS (Retd) leh Dr Anil Kumar Joshi-te hnenah Doctors of Letters (D.Litt. Honoris Causa) a hlan bawk.

ICFAI University, Mizoram hi ICFAI Group hnuaiah kum 2006 khan din niin, zirlai 466, faculty member 68 (regular 34 leh visiting 34) bakah non-teaching staff 11 an awm mek a; PG-ah programme 12 leh UG programme parukah zirna an kalpui mek a ni.