Health Minister-in Mizoramah an CSR hmang ṭangkai turin company-te a sawm

Nimin khan Bhubaneswar, Odisha-ah CSR & Sustainability Conclave 2025 buatsaih a ni a, khual­zahawm Health minister Lalrinpuii chuan an Mizoramah an CSR hmang ṭangkai turin mipuite a sawm.

Lalrinpuii chuan hmarchhak state aṭanga a bik taka conclave-a tel tura sawm a ni chu ropui a tih thu sawiin, "CSR kaltlangin PSU leh private company lian tam takin mipui hnenah hmasawnna nasa tak an thlen tawh. UNSDG-in a phutte tihhlawhtlinna turin hmalakna tur tam tak a la awm avangin mihringin damkhawchhuah nana a mamawh kawng hrang hrangahte hmasawnna rualkhai taka a kal a pawimawh a ni," a ti.

CSR fund hman ṭangkai kawngah state lian leh te, a bikin hmarchhak state-te kan inthlauh thu sawiin Health Minister chuan, "Mizoram phei chu India ram zingah CSR fund dawng tlem ber kan nih avangin kan la hnufualna a bikin infrastructure, health leh livelihood sector-ahte Mizoramah rawn lut rawh a, state sorkar chu zau takin a inhawng," a ti a, Chief Minister office-ah CSR cell dina hma lak mek a nih thu a sawi.

Lalrinpuii chuan Companies Act 2013 hmanga company leh PSU-te chu an hlep aṭanga mipui a luangchhuak ve tura a phut ang ngeiin, an company dinna leh hnathawhna hmun piah lamah pawh insemzai a luangchhuak ve tura a beisei thu sawiin, "Mizoram chu inkalpawhna ṭha kan la neih ṭhat tawk loh avanga harsatna state dangten an tawh loh tawk kan nih avang leh industry lian kan neih loh avangin CSR fund leh innovation lama tuite sorkarin phur takin a lo dawnsawng ang," a ti.

Ni hnih chhung awh tur conclave hi Odisha dy CM Kanak Vardhan Singh Deo chuan a hawng a, PSU company-te bakak start up company ṭhahnem tak an kalkhawm a ni.