KHAWTHLIR

MLA-in lawmthu sawi

Dampa bial MLA atana thlan tlin tak Dr R Lalthangliana, MNF sr vice president chuan nimin khan a bial chhung Hnahva leh Silsuri tlawhin, MLA atana thlan tlin a nih avangin mipui hnenah lawmthu a sawi. Dr Thangtea chuan, "Kumthar lamah chuan NGO-te pawh sawmin khawtin mamawh zual ngawih ngawih bik ṭheuh atan 'Specific Village-Level Grassroot Plan/Village-Level Development Plan' ang deuh din i la, kan theihna chinah chuan nasa takin hnathawh kan tum dawn a ni," a ti.

Border Festival

Cachar District Administration chuan November 24, 2025 khian Dholai-ah 'Border Festival' a buatsaih dawn. He hunah hian Assam leh Mizoram mipuite inkara inlaichinna ṭha zawk leh inzawmna thar siam a nih theih nan hnam zia rang entirna hun hman a ni anga, infiamna hrang hrang pawh neih tum a ni. Border Festival neih tur hi November 20, Ningani khan CDC Dholai pisa-ah state pahnih official-te'n an sawiho.

DEAF inhrilhfiah

Aizawl additional DC Zoramsiama Hmar kaihhruaiin nimin khan DC conference hall-ah Depositors Education and Awareness Fund (DEAF) chungchang inhrilhfiahna hun buatsaih a ni a; sorkar laipui ruahman angin kum 10 chuang khawih chet tawh loh bank account-a pawisa awmte account neituten an lak chhuah theih tawh thu tarlan a ni.

Academy Award 2025

Mizo Academy of Letters-in kum thum dana a hlan ṭhin Academy Award (Posthumous) 2025 dawng turin Revd. Dr Chuauṭhuama (L) thlan a ni. Award hi November 28, 2025 khian Assembly speaker Lalbiakzama'n MAL kum tawp intawh­khawmah Revd. Dr Chuauṭhuama (L) chhungte hnenah a hlan dawn a ni.

Hmalak dan tur rel

Champhai Town Sanitation Task Force chu district bawrhsap Mohammad Aaquib hoin nimin khan DC conference hall-ah an ṭhukhawm a, Mizoram Cleanliness Competition kalpui meka hmalak dan tur relin, sorkar department, tlawmngai pawl leh village council-te hna chanpual tur an siam.