Ramri hung dodal turin ZORO-in mipui an sawm

ZORO hruaitute chuan nimin khan Aizawl Press Club-ah thuthar theh­darhtute an kawm a; sorkar laipuiin Indo-Myanmar ramri hung tuma hma a la mekna doa ṭanrualpui turin mipui, sorkar leh NGO te an sawm.

ZORO vice president L Ramdinliana Renthlei chuan, ramri hung vang hian Zofaten harsatna nasa tak an tawh dawn thu leh Indo-Bangladesh ramri hung tawhna aṭangin hei hi a chian thu a sawi a, "Indo-Bangladesh ramri hung a nih khan Mizoram pawnah khaw 12 zet hung chhuah a ni a, khawlai tan tlang khaw pathum a awm bawk a, hmun ṭhenkhatah phei chuan km. 1 dawn a hlaahte ramri hungna hi siam a ni," a ti.

Indo-Myanmar ramri hung chungchang hi ngun taka an zirchian thu sawiin L Ramdinliana chuan, "Zofate tan a ṭhat lohzia ṭhahnem tak kan hmu a, Zotaten kan tawrhna tur hi nasa takin a pung dawn. Myanmar-a awm leh India rama awm Zofate hi unau, thisena inzawm kan nih avangin chhiatni ṭhatniah kan intlawh pawh a, nupui/pasal kan in neih pawlh a, daidanna bang siam a nih chuan kan inunauna a bo telh telh dawn," a ti a, hnam lian zawkten Zofate an chimral ve ve na tur hman-ruaah an ngai tih a sawi.

L Ramdinliana Renthlei chuan, "Indo-Myanmar ramri hung a nih chuan Mizoram leilung ṭhahnem tak kan chán dawn a, ramri aṭangin yard 150 vela a hungna siam tur a ni a, ramri hrûla chêng ṭhahnem tak ei leh bar zawnna a tla chhe nghal dawn a, kan leilet te, sangha manna te, kan balu lakna zawng zawng kan chán vek dawn. Hei hian chhungkaw ṭhahnem tak mangangin a siam dawn a ni," a ti bawk.

ZORO hruaitute chuan ramri hung tura hmalakna dodal turin Mizoram sorkar, pawl leh mipui an sawm a, "India sorkarin border fencing kalpui tura hma a rawn lak tirh khan sorkar leh NGO hrang hrangin kan dodal vek a, India sorkar pawh a tîm deuh niin a hriat," am ti a, hun a'n kal deuha dodalna a nêp tâk deuh avangin ramri hung tura hmalakna kalpui ṭan a ni mek thu an sawi.

District ṭhenkhatah phei chuan survey pawh neih zawh a nih tawh thu sawiin ZORO hruaitute chuan, "Arunachal Pradesh-ah chuan dodalna a nasat avangin kalpui mumal theih a ni lo. Nagaland-ah pawh sorkar leh NGO-ten an dodal nasat avangin an kalpui theih rih lo a, Manipur hmun ṭhenkhatah kalpui ṭan mek a ni," a ti.