Sardar @150 Unity March neih a ni

India ram zalenna sualtu ropui Sardar Vallabhbhai Patel (Iron man of India) piancham kum 150 lawmna pualin nimin zing khan Mizoram hmun ṭhenkhatah inpumkhatna kawng zawh (Sardar @150 Unity March) neih a ni a; Aizawlah chuan Sikulpuikawn leh Chanmari aṭangin Lammual thleng kawng zawh niin, Lammualah hian minister Dr Vanlalthlana hoin kawngzawh kharna inkhawm neih a ni.

Sikulpuikawn aṭanga Lammual inkar inpumkhatna kawng zawh hi Aizawl additional DC Zoramsiama Hmar-in a hoa, Chanmari aṭanga Lammual inkar kawng zawh hi additional DC Vanlalrova'n a ho ve thung a; Higher Secondary School pariata National Sevice Scheme (NSS) volunteer te, Mizoram Police te leh sorkar hnathawkte an tel.

Dr Vanlalthlana chuan, "Sardar Vallabhbhai Patel piancham vawi 150 kan lawm mek lai hian India ram inpumkhat nana Sardar Vallabh-bhai Patel hnathawh ropui tak te, a tumruhna, a huaisenna leh ram a hmangaihna thinlungte kha hre reng i la, India ram inpumkhatna tichhetu leh tihbawrhbangtu ni loin, a chawinungtu kan nih ve ṭheuh theih nan inhlan thar ang u," a ti.

Lammuala kawng zawh kharna inkhawm hi Aizawl DC Lalhriatpuia'n a kaihruai a, SDO Srinivas Sidi kaihhruaiin kawng zawha telte'n inpumkhatna thutiam (unity pledge) an sawirual a ni.