Kum tling lote dikna chanvo zirho

Mizoram State Commission for Protection of Child Rights (MSCPCR) chuan nimin khan Planning conference hall-ah MHIP Gen. Hqrs leh Aizawla MHIP Branch hrang hrang hruaitute pualin naupangte dikna chanvo zirhona, 'Sensitization cum Consultation Workshop on Child Labour with Special Reference to Under Aged Domestic Workers' an buatsaih.

MSCPCR chairperson Jimmy Laltlanmawia chuan, Mizo naupangte tana MHIP-te hmalak tawhnate ropui a tih thu leh MHIP-te nena ṭangrualin state danga hmeichhe naupang an chhanchhuah tawh thute a sawi a, "Nu leh pate lakah ngêi pawh naupangte an him tawh lo a, hmalak a ṭul takzet. Khawvel changkang zelah awmpui mamawhna a sang zel a, Mizoramah pawh awmpui tel loa awm thei lo kan awm tâk nual avangin hetiang kaihhnawih dan kan hriat a, kan zawm a pawimawh," a ti.

Zirhonaah hian Gauhati High Court (Aizawl Bench) registrar Dr HTC Lalrin-chhana leh MSCPCR legal officer Priscilla Lallawmsangi ten MHIP hruaitute chu thil pawimawhte an hrilhfiah a, sawihona hun leh zawhna leh chhanna hunte hman a ni.

ZIRHONAA TARLAN ṬHENKHAT
* Kum tling lote hnathawh phalsakna hmunah chawlh lailawk awm loin darkar 3 aia rei chhawr phal an ni lo.
* An hnathawh karlakah darkar 1 tal chawlh an nei tur a ni.
* An hnathawh rei zawng belhkhawm hi ni 1-ah darkar 6 aia rei a ni tur a ni lo.
* Zan dar 7 leh zing dar 8 inkarah hnathawka chhawr phal an ni lo.
* An hnathawhna hmuna hnathawh darkar bituk aia rei (overtime)-in chhawr phal an ni lo.
* Ni khatah hmun khat aia tamah hnathawka chhawr kawi phal a ni lo.
* Hnathawka chhawrna hmunah sorkar thuneitu (inspector) enfiah theihin ziaka chhinchhiahna (register) vawn ngei tur a ni.
* Hnathawhna hmunhma chu an hriselna leh himna atana cheibawl chungchangah sorkar laipui/state sorkarin inkaihhruaina (rules) a siam ang.
* Hnathawka chhawr an nih pawhin chawlhkar khatah ni 1 tal nilengin chawlh hahdamna hun an nei tur a ni.
* An hnathawhna hmun neitu hian an hnathawhna hmun langsar laiah he an chawlh nî tur hi a tar chhuak ngei tur a ni.
* Thla 3 danah vawi khat bak hemi chawlh nî tur hi tihdanglam theih a ni lo.