Saikhumphai zawlah vaimim seng runpui

Agriculture an Farmers Welfare department, Field Management Committee (FMC), Multipurpose Primary Agricul-ture Credit Society (MPACS) leh Vaphai VC ṭangho chuan nimin khan Saikhumphai zawl, Ṭiau kamah vaimim seng runpui an buatsaih a; Agriculture direc-tor R Lalnunzira'n a hmanpui.

R Lalnunzira chuan, Mizoramah buh thar chhuah a tlem thu leh 4% vel bak buh thar theihna hmun a awm loh thu a sawi a, "Buh thar tam lamah ṭan lak a ngai hle a, Silchar kawng chhe hlek se pawisa ngah tak chunga eitur nei lo thei dinhmunah kan din avangin nasa lehzuala buh thar tam lamah hmasawn a ṭul. Buh mai bakah fu leh thlai lamah pawh intodelh a ṭul hle a, kut hnathawktute ṭan la sauh sauh ang che u," a ti a, department lam chuan mi taimate an puih hreh loh thu leh an inhawn reng thu a sawi.

Saikhuamphaiah hian kum 2021 aṭang khan vaimim chìn ṭan niin, kumin hian quintal 2,000 chuang thar thei turah an inngai. Vaimin hi a hmunah ṭin khat Rs 300-in an hralh a, ran chaw atan an hralh hnem ber a ni.

Vaimin seng runpuiah hian Agriculture joint director B Ramnunsanga, joint director Lalengliana, deputy director Lalsangzuali Hmar, Khawzawl DAO Lallawmzuali, Sairual DAO Hmangaihthangi Renthlei, Champhai DCO B Lalchhanhima, DVO Lalbiakzuala Sailo leh sorkar hotu dangte an tel a; tlaiah ruai an ṭheh nghal.