UDPA-in award dawn an lawm

UDPA department chuan November 20, Ningani zan khan Ministry of Housing & Urban Affairs aṭanga Mizoramin ‘Special Award for Efficient Traffic Management System’ a dawn chu Aijal Club-ah an lawm a, UDPA minister K Sapdanga leh Transport minister Vanlalhlanate'n an hmanpui.

K Sapdanga chuan an award dawn chu mipui award liau liau a nih thu sawiin, "Hun remchang awm thei phei se chuan zau zawka a lawmna hun buatsaih hial a phu/ Mipui award a ni tih lantir nan leh mipuite hnena lawmthu sawi nan, naktuk (nimin) ah city bus-a chuang ṭhin zawng zawngte tan bus fare, a chanve chauh lak a nih dawn bakah leh Aizawl Traffic Police duty zawng zawngte chu chawchhun pek vek an ni ang," a ti.

Transport Minister pawhin thu sawiin, "Mizo-ramin he lawmman a dawn theih chhan chu, department hrang hrang, a bikin - police (traffic), Transport leh UDPA-te inkara thawh hona a that vang a ni. Chutihrualin he lawmman dawn a nih theihna chhan bul ber chu mipuite an ni," a ti a, pi leh pute hnen aṭanga kan chhawm, Zo nun ze mawi leh leh lirthei khalhtute awm dan mawi takte avanga he lawmman hi dawng thei kan nih thu a sawi.

Award lawm inkhawm hi UDPA secre-tary Lalmalsawma'n kaihruaiin, chief secretary Khilli Ram Meena leh Traffic SP C Vanlalvenate pawhin thu an sawi.