Bawngkawn - Leitan kawng cheiṭhat tum; Leitan - Leitan tê kawng titlang dawn

Mizoram sorkar chuan Urban Development & Poverty Alleviation (UDPA) kaltlangin Bawngkawn - Durtlang Leitan kawng cheiṭhat an tum a, Leitan - Leitan tê (Synod Hospital gate bula chhuak) pawh tih tlang tum a ni.

November 22, Inrinni zing khan kawng cheiṭhat tur leh kawng tih tlang tur hi UDPA minister K Sapdanga chuan tlawhin, hnathawh dan tur a enfiah. UDPA Minister hi AMC dy mayor R Thanglura, executive corporator pahnih Lalringliana leh B Lalawmpuii, UDPA secretary Lalmalsawma, UDPA director Jacob Lalawmpuia leh Bawngkawn leh Leitan khawtlang hruaitute'n an ṭawiawm.

UDPA Minister chuan hmalakna tur chu Complete Street Design tih a nih thu sawiin, "Ṭhenkhat chuan kawng tihzau emaw an ti a, a ni chiah lo. A nih ang ang ṭangkai taka hman a, cheimawi a ni," a ti.

Kawng sirah in sak a awm thluah tih sawiin K Sapdanga chuan, "Kawng hnai tê te, kawng area a ni hlawm. Ṭha takin kan dawr ang a, kawng area chin an lo kian turah kan ngai. Kian duh lo an awm kan ring lo. Kian duh lo tlatte pawh an awm mai thei a, chutiang a awm a nih chuan dan lekkawh a ngai ang," a ti a, dan kenkawh a ngaih a rin loh thu a sawi.

UDPA Minister chuan kawng area bak tlema cheimawi duhlai an neih thu sawiin, "Mimal ramte pawh kan su maithei, chu'ngah chuan ṭha takin kan dawr ang a, inremna siampui kan tum ang. Pawisa sanction a awm vek tawh a, hna kan ṭan thei ṭep. Helai kawng hi hmun nuam tak, khualzin leh tualchhung mite tana tlawh chakawm tura siam kan tum," a ti.

Leitan leh Leitan tê inkar pawh tih tlang a nih dawn thu sawiin K Sapdanga chuan, "Tunah hian sanction awm sa vek a ni a, karlehah hna ṭan hman tum a ni. Hei hi kan zawh hunah chuan Durtlang khawtlang tan, damdawi-ina kal tur, Kolasib lam kal turte tan a ṭangkai dawn hlein kan hria," a ti a, an phur viau tawh thu a sawi.

UDPA secretary Lalmalsawma chuan Bawngkawn - Durtlang Leitan cheiṭhatna atan hian cheng vbc 15 sanction a nih thu sawiin, "Tunah hian hnathawh ṭan turin hmalak mek a ni. Tender kan chhuah mek a, hnathawh theih ṭan thuai kan tum. Tun working season chhung hi ṭangkai taka hman kan tum. Hnathawh ṭan aṭanga kum 1 chhunga zawhfel hman kan beisei," a ti.

Leitan - Leitan tê thawk turin contractor an thlanfel tawh thu sawiin UDPA Secretary, "Hnathawh ṭan thuai a ni dawn," a ti a, hnathawhna atan cheng nuai 120 vel ruahman a nih thu a sawi.

Bawngkawn-Durtlang Leitan cheiṭhat turah hian a drawing peihfel vek a ni tawh a; ruahman dan chuan hmun hrang hrang­ah naupang tual­chaina, chawlh hahdamna, khawthlirna, open gym leh inthiarna hmunte siam tum a ni. Inthiarna hmunahte hian ruahtui khawlkhawmna siam a, chu chu hman ṭangkai tum a ni bawk.