KHAWTHLIR

Bazar hawng

Aizawl North-III bialtu MLA K Sapdanga'n a bial chhung Hunthar Venga Horticulture building kawng àn hnuaia MLA fund hmanga Hunthar Veng leh a chhehvel tana mipui mamawh lam khawmna tur a buatsaih chu November 22, Inrinni zing khan Hunthar MUP president C Dakliana'n a hawng. K Sapdanga hian Horticulture minister C Lalsawivunga chu an department building hi Hunthar Bazar atan a dil a, hman hawh a lo remtihsak a ni. Bazar-ah hian mi 41 an ṭhu leng a ni.

Tuiah tla hlum

November 21, Zirtawpni tlai khan S Rozamliana (22) s/o Lalchungliana, Hunthar Veng chu Tlawng Lui (Nghaper Li), SIPMIU) tuilaknaah a tla hlum. S Rozamliana hi a ṭhiante nen luiah hian an kal a, a chesual palh a ni. Tuitla zawn hna hi Hunthar Veng, Tanhril leh Nghalchawm khawtlangin an thawk a, Inrinni zing dar 7:45 vel khan a tlakna aṭanga hla lo teah an hmu.

Methamphetamine leh heroin man

BSF, Aizawl leh Excise & Narcotics department ṭangkawp chuan November 21, Zirtawpni khan Chanmari West-a in pakhatah metham-phetamine kg 5.89 leh heroin gram 41 an man. A kaihhnawihah Myanmar mi pahnih leh Assam mi pahnih man telin, a kaihhnawih dang awmthei an chhuizui mek.

World AIDS Day

Lunglei District AIDS Prevention & Control Committee (DAPCC) chuan additional DC Zoramdini hoin tun hnai khan Lunglei district-a 'World AIDS Day 2025' hman hun atan December 1, 2025 an ruat a; TI-NGO a thawktute leh HIV kai awlsam dinhmuna dingte a tam thei ang ber tel tura sawm ni se, an ti.

Open chess championship

Assembly deputy speaker Lalfamkima, Kolasib bialtu MLA ni bawk chuan November 22, Inrinni khan Kolasib Parish Hall-ah 1st Kolasib Open Chess Championship 2025 kharna a hmanpui a; category hrang hranga tiṭhate hnenah lawmman a hlan. Lalfamkima chuan ṭhalaiten chess an tuipui chho zel chu lawmawm a tih thu sawiin, inelna sang zawng hmachhawn thei tura theihtawp chhuah turin a chah.

Vawksa rate zawm turin ti

Lunglei district bawrhsap Navneet Mann chuan thupek tichhuakin, Lunglei Municipal Council (LMC) tana vawksa rate bituk thar zawm tura hriattirna a ti chhuak. Bawrhsap chuan, District Level Committee on Fixation of Prices of Meats, Vegetables and Fruits-in Mizoram Market (Regulation and Facilitation) Act, 2022 tlawhchhana LMC huam chhunga vawksa man kg. khat Rs 450 tura a bituk chu zawm ṭheuh turin vawksa zuarte a hriattir a; thupek zawm lote chu dan anga hrem an nih tur thu a tarlang.