Telangana leh Mizoramin sports-a thawhhona turin inremna an ziak

November 22, Inrinni zan khan Telangana leh Mizoram chuan infiamna (sports)-a thawhhona turin Hyderbad-ah inremna an ziak.

Sports minister Lalnghinglova Hmar chu Inrinni khan Hyderabad-a 'Telangana - North East Connect: A Techno-Cultural Festival' neihah sawm a nih anga telin, Telangana leh North East state-te sports hmanga thlunzawm ngheh dan chungchang sawihona (discussion panel) telpuiin, Mizoram leh Telengana hian sports hmasawnna tura thawhhona thuthlung an ziak a ni.

Thawhhona thuthlung hi state pahnih sorkar official lamin an ziah hnuah Telangana Governor Jishnu Dev Varma leh Lalnghinglova Hmar-te'n an inhlan tawn a; Telagana chief minister A Revanth Reddy pawh inremna ziahnaah hian a tel.

'Spirit of the Game: Connecting Telangana and the North East' topic hmanga discussion panel-ah hian Sports Minister 'Mizoram as a future sports powerhouse' tih thupui hmangin thu a sawi a, "Mizoram chuan hma thlir neiin sports a kalpui chho mek. Football leh discipline ṭhenkhata kan hlawhtlin anga Olympic sports danga hlawhtlin dan kawng kan dap," a ti.

Lalnghinglova Hmar chuan chuan Emerging Mizoram Sports (EMS) kalpui a nih dan tur sawi chhuakin, "State pum dâpa talent zawn chhuah hna an thawh a ni dawn," a ti a, Telengana nena infiammite intlawh tawn, coach inkal pawh tawn leh Telengana state-in sports hmunhma a neihte Mizoram infiammiten man chawi loa training-na atana an hman theih dan turte rawtna a thlen.

Sawihonaah hian India rama infiammi langsar, badminton tana sulsutu Telengana mi Pullela Gopichand, Olympic silver medalist Manipur lam mi Mirabai Chanu, Sikkim football star Bhaichung Bhutia leh midangte an tel.

November 21, 2025 khan Telangana leh North-east team te'n Football-ah exhibition match an khel a, Lalnghinglova Hmar hian khuallian niin he hun hi a hmanpui.

'Telangana - NE Connect' hi Raj Bhavan, Telangana leh Telangana sorkar ṭangkawpin an buatsaih a ni a; sports bakah field hrang hrang - music, women empowerment, fine art, performing art, literature leh film testival-te awmin, Telangana leh Northeast state-te inthlunzawm a thawhho dan tur ngaihtuah leh pholan a ni.

Telangana Governor Pu Jishnu Dev Varma, Chief Minister Pu A. Revanth Reddy leh Minister te bakah North East state-a field hrang hranga mi challang tak takte telin programme hlawkthlak tak hman a ni.