Khawrihnim P/S-in kum 100-na lawm; Social media-in min run nasa hle - Education Minister

Khawrihnim Primary School chuan November 22, Inrinni khan an sikul kum 100-na (centenary) an lawm a; School Education minister Dr Vanlalthlana'n hmanpuiin, centenary lung a hawng a, social media-in mi tin a rùn nasat thu a sawi.

Dr Vanlalthlana chuan, Khawrihnim Primary School-in kum 100 a tling ta chu a lawmpui thu a sawi a, "He sikul aṭanga mi chhuanawm tak tak an chhuak hi a lawmawm takzet. Zirna lamah ṭan lak a ṭul hle a, khawtlang hruaitute, tlawmngai pawlte leh nu leh pate ṭanrual a ngai. Veng chhung an ṭanrual chuan MLA-te pawhin an hawisan thei lo a, sorkar leh mipuite ṭanho a ngai a ni," a ti.

Social media-in khawpui leh thingtlang a rûn nasa tih sawiin Education Minister chuan, "In awmtlei nan kan hmang nasa a, smartphone leh TV-te khawih chin tâwk neih a ngai. Nu leh pate hian hmasawnna thil chi hrang hrang kan neih hian mawhphurhna kan neih belh zel tih kan hriat a ngai a, kan fate thil zir ngaihvenpui a ṭul," a ti a, zirtirtute pawh thil thar hmu chhuaktu leh siam chhuaktu an nih thu leh syllabus mila thil thar zirtir thei ni turin a chah.

Education Minister chuan, "Kan ram zirnain hma a sawn theih nan tun session-a third term aṭangin zirlaiten zawhna inang an chhang dawn a, government, deficit leh adhoc grant in aid school-a pawl 5-8 zirlaiten an chhang dawn a, hei hian zirnaah danglamna a siam ang tih ka beisei," a ti bawk.

PUC principal Prof. H Lalthanzara, khualzahawm pawhin thu sawiin, centenary souvenir a tlangzarh a; School Education director Angela Zothanpuii, SCERT director Caroline Zoramthangi leh Samagra Shiksha state project director C Lalthanzira te pawhin centenary lawmpuina thu an sawi.

Khawrihnim Primary School hi kum 1901 -a thingtlanga sikul enchhin pathum zinga mi niin, kum 1925 aṭangin chhum lo chat loin zirna kalpui a ni. Headmaster hmasa ber chu Chalsuakpuia niin, he sikulah hian zirtirtu 17 an thawk tawh a, kumin hian zirlai 51 an awm mek.

Centenary lawmnaah hian sorkar hotute bakah he sikula thawk tawh leh thawk mek te, zirlaite leh zir chhuak tawh te, khawtlang hruaitute leh khawtlang mipui an tel a ni.