Dispatch and Receiving Team training

Lai Autonomous District Council (LADC) hnuaia 12th Member of District Council (MDC) inthlanpui December 3, 2025-a neih tur atan November 22, Inrinni khan Lawngtlai DRDO conference hall-ah Dispatch and Receiving Team-te pualin training buatsaih a ni a; district election officer Donny Lalruatsanga, bawrhsapin hmanpuiin, tihsual awm lo tura ṭha taka training turin a chah.

Donny Lalruatsanga chuan, inthlanna felfai leh thianghlim nei turin mawhphurhna hrang hrang neite'n theihtawp an chhuah a ṭul thu a sawi a, "A bik takin official-te tihsual nei lo tura fimkhur a pawimawh hle. Dispatch and Receiving Team-te in pawimawhin mawhphurhna lian tak in nei a, tihsual awm lo turin ṭha takin training ang che u, " a ti a, ṭha takin hna an hlen a ṭul dawn thu a sawi.

Training-ah hian master trainer Gilbert Lalhlimpuia leh election officer Collin Hlychho-ten Dispatch and Receiv-ing Team-te chu an mawhphurhna hrang hrang, tih tur leh tih loh tur, hriat tur pawimawh leh ṭul dangte an zirtir a ni.