MCS-in inkhawmpui an hmang: Thuneihna kan semzai a ngai - DPAR Minister

Mizoram Civil Service Association (MCSA) chuan nimin khan Aijal Club-ah inkhawmpui an hmang a, an hun hmanpuitu DPAR minister K Sapdanga chuan, thingtlang kilkhawr zawkte tan thuneihna semzai a ngaih thu a sawi.

DPAR Minister chuan DC pisa-te chu mini-secretariat anga kalpui an tum mek thu a sawi a, "Hei hi thutlukna siam kawngah pawh chak zawk leh mipui hnena service ṭha zawk leh samkhai zawk a awm theihna atan kan duh a ni. Thil eng emaw tih dawn hleka thingtlang kilkhawr zawk aṭanga Aizawl pan ngai kher loa district headquarter-a tih el mai theih turin thuneihna pawh hi kan semzai a ngai," a ti.

K Sapdanga chuan ram inrelbawlna leh sorkar a awm chhung chuan civil service hi chuan neitu chan an chang reng dawn tih sawiin, "Ṭhangthar lo awm zel tur ngaihtuah chungin tun hunah hian thuthlukna dik siam thiam tur a ni," a ti a, political power-in khuarkhurum a dai dawn pawha venpui ngam lo chu civil service officer dinhmun chelh tlak a nih loh thu a sawi.

MCS nih hnuah a hma aiin inzir nasat zawk tur a nih thu sawiin DPAR Minister chuan, "Vikshit Bharat 2047 kan thlen rualin Vikshit Mizoram kan thleng ve ngei tur a ni. Vikshit Civil Service Officer kan pungkhawm mekah kan inchhal ngam ang chu. Sawiseltute thu ngaihthlakte hian hlawkna tam tak a nei. Hmaichhana fak vak vak ṭhintute hriat loh thil tam tak hi khawlaiah a awm tih pawm tur a ni," a ti.

DPAR Minister chuan transfer and posting chungchang sawiin, "Ṭangkaina ber hmun apiangah a theih ang angin indah kan tum ang. Hna dilnaa pakhatnate hi posting-ah duh thlantir kan ching a, norms angin kan lo nei rei tawh hle. Hei hi tihbo tum a ni. Junior grade leh senior grade-ah a tam thei ang bera remote area field-a awm dan tur ngaihtuah a ṭhain a lang," a ti a, Aizawla post nuam sa zawk chhuahsan ngamte chu officer ṭha an nih ṭhin thu a sawi.

Field experience nei lo, mipui mar la dek ngai lo officer, secretariat-ah an tam lutuk hian sorkar leh mipui inkarah kar âwl a siam ṭhin thu sawiin, "Sorkar hna kan thawk duh a nih chuan post awmna apiangah kan thawk thei tur a ni. Central Secretariat kan en chuan, policy making line-ah field experience nei lo officer chu joint secretary leh a chung lamah an awm ngai meuh lo. Tun aṭang chuan, secretariat posting chungchang hi central mila kan kal ve a hun ta hle," a ti.

MCSA inkhawmpui hi an pawl vice president CC Lalchhuangkima'n kaihruaiin, president V Lalengmawia pawhin thu a sawi. Chawhnu lamah ‘Institutionalization of District Administration as an Integrated Mini-Secretariat’ leh ‘Ongoing Reforms and Progressive Decentralization of Land Revenue Administration’ chungchang an zirho.