Union Minister-in sorkar laipui scheme-te tihlawhtlingtu ni turin loneitute a fuih

Union Agriculture and Farmers' Welfare minister of state Ram Nath Thakur chuan nimin khan Siaha tlawhin, 'Poorvottar Sampark Settu Programme ' hnuaia hnathawh hrang hrangte a enfiah. Union Minister chuan loneitute chu sorkar laipuiin ṭanpuina a pek ṭhinte leh scheme hrang hrang a kalpuite ti hlawhtlingtu nih tum turin a fuih.

Union Minister hi MADC chief executive officer M Laikaw, district bawrhsap VL Hruaizela Khiangte leh SP Manjeet Singh Sankhla-ten lo dawngzawngin, MADC Golden Jubilee Hall-a Agriculture department buatsaih exhibition a tlawh bakah sorkar hotute leh mi pawimawh dangte nen an inkawm a ni.

Ram Nath Thakur chuan, Prime Minister thupek anga Siaha chu tlawh a nih thu a sawi a, "Siaha mipuiten harsatna an neih leh mamawhte chu Prime Minister hnena ka thlen dawn a, loneitute hmasawnna chu sorkar laipui ngaih pawimawh ber a nih angin chak taka hmalak mek zel a ni. Loneitute'n ṭhahnem ngai takin thawk ula, sorkar laipuiin ṭanpuina a pek ṭhin leh scheme hrang hrang a kalpuite tihlawhtlingtu nih tum ang che u," a ti a; mamawh an neite ziaka thlen tura chahin, Prime Minister leh Union Minister for Agriculture and Farmers' Welfare hnenah amah ngeiin a pek tur thu a sawi.

District bawrhsap VL Hruaizela Khiangte chuan ṭhutkhawm hi kaihruaiin, Siaha district dinhmun tlangpui a tarlang a; MADC CEM M Laikaw pawhin sorkar laipuiin autonomous district council-te ṭanpuina a pek ṭhin chu ṭangkai taka hman ṭhin a nih thu leh khawsak harsa zawkten an chhawr ṭangkai thu a sawi bakah, Siaha mipuite tana ṭanpuina awm thei ang angte ṭhahnem ngai taka ngaihtuahpui turin Union Minister chu a ngen bawk.

Union Minister hian Siaha Krishi Vigyan Kendra (KVK) tlawh nghalin thawktute nen an inkawm a; District Hospital, Siaha pawh tlawh nghalin, medical superintendent Dr C Lalrosanga leh thawktu dangten an lo dawngsawng.

KVK hotute nen an inkawmnaah Union Minister chuan, loneitute hamṭhatna tura thawktu an nihna hre reng tur leh an rawngbawlna ṭha taka hlen turin a chah a; 'Best Innovative Framers Award' semin, KVK-ten stall an buatsaih a en nghal a ni.