Chetsualnaah mi pathum an thi

November 23, Pathianni zan leh nimin zing khan hmun hnihah chetsualna avangin mi pathum an thi a, mitthite hi mipa vek an ni.

Pathianni zan dar 11:50 vel khan East Lungdar leh Biate inkar, East Lungdar aṭanga km 2 velah Champhai lam aṭanga tlan bungraw phur truck lian chesualin, kawngthlangah metre 150 vel a lum. Chetsualna hmunah hian lirthei khalhtu leh a neitu Lalrinthanga (33) h/o Lalṭanpuii a thi.

Lirtheia chuang ve dang Rualthanchama (31) h/o Zachhingpuii chuan hliamna tak a tuar a, East Lungdar PHC panpui a nih hnuah a hliam tuar loin nimin zing dar 7:30 vel khan a thi.

Rualthanchama leh Lalrinthanga ruang la tur hian Champhai Zotlang aṭangin mi eng emaw zat an kal a, tlai dar 2 velah East Lungdar an thleng.

East Lungdar khawtlang chuan mithhi ruang lak chhuah hna leh hliam tuar lak chhuah hna zanlaiah inkokhawmin an thawk a ni.

B Malsawmtluanga (27) s/o B Ramnunsanga, Ramthar North chu nimin zing dar 1:40 khan a room tukverh aṭanga a tlak vangin a thi.

Thudawn danin, B Malsawmtluanga hi a pa nen inkhel an en a, inkhel an en zo a room-a mu tura a lut chu tukverh aṭangin a tla a ni. Damdawi-in panpui thuai nimah se, a hliam tuar loin a thi a; nimin chhun dar 1 khan vui a ni.