KHAWTHLIR

Thisen pe

Zemabawk Higher Secondary School chuan nimin khan an kum 25 (silver jubilee) tlin lawmna pualin Civil Hospital, Aizawl tan thisen unit 56 an pe. Thisen petute hi mipa 39 leh hmeichhe 17 an ni.

MUP faina hnatlang

Serchhip district Mizoram Upa Pawl (MUP) bultumin nimin khan Serchhip khawpuiah Swachh Bharat Mission (Gramin) hnuaia khawpui fai intihsiakna pualin 'Faina Hnatlang’ neih a ni a; MUP member 100 chuang thawk chhuakin, khawpui chhung kawng dung bakah Bazarpui leh a chhehvelte an tifai. Serchhip DC chuan District MUP Faina Hnatlanga thawk chhuakte thingpui lum nan Rs 10,000 a pek bakah, Serchhip Kawnpui ‘N’ VC-ten Rs 500 an pe a ni.

EVM endik

Lai Autonomous District Council (LADC) inthlanpui neih tur atana inbuatsaihna kal zelah nimin khan Lawngtlai DC conference hall-ah EVM enfiah thawh khatna neih a ni a; EVM-te hi Bharat Electronics Limited, Bangalore engineer-ten an endik a ni.

Health dept-in khawl an dawng

Health department chuan an minister Lalrinpuii hoa TATA AIG CSR Vice President hnena CSR kaltlanga portable/mobile X-ray khawl pahnih an dil chu a hlawhtling a; khawlte hian nimin khan Aizawl rawn thlengin, CSR implementing agency Mission Foundation Movement (MFM) kaltlangin NHM-in an lo dawng a ni.

AMR week khar

Zoram Medical College & Hospital (ZMCH)-a Microbiology department buatsaih World Antimicrobial Resistance (AMR) Awareness Week chu nimin khan khar a ni a; awareness week denchhen hian MBBS (2nd year) zirlaiten poster leh slogan in ziahsiak an neih bakah, thupui thlan bik hmangin AMR chungchang zirho a ni.